کورونا وائرس کہاں جا کر رکے گا اور آگے کیا ہوگا کسی کو نہیں معلوم، ہندوستان میں جہاں کورونا کے پھیلاؤ کو روکنے اور عوام میں بیداری پیدا کر نے کے لئے وزیر اعظم کی اپیل پر پورے ملک میں عوام نے اپنے اوپر ’جنتا کرفیو‘ کا نفاذ کیا ہوا ہے۔ اب یہ خبر آ رہی ہے کہ پورے ہندوستان میں 31 مارچ تک کوئی مسافر ٹرین نہیں چلے گی اور ملک کے کورونا سے متاثر 75 اضلاع کو پوری طرح لاک ڈاؤن کر دیا جائے گا۔
دنیا کے ہر کونے میں پھیلنے والا کورونا وائرس ہندوستان میں بھی پیر پسار رہا ہے اور تازہ خبروں تک ہندوستان میں کورونا متاثروں کی تعداد 345 سے زیادہ ہوگئی ہے اور ابھی تک 7 لوگوں کی موت ہو چکی ہے۔ ادھر حکومت نے جو کورونا سے متاثر 75 اضلاع کو لاک ڈاؤن کرنے کا اعلان کیا ہے، اس کا سیدھا مطلب ہے کہ ان اضلاع کے لوگوں کا ملک کے دیگر عوام سے اب کوئی رابطہ نہیں رہے گا۔
ادھر آج رات نو بجے تک چلنے والے ’جنتا کرفیو‘ کا وقت نوئیڈا میں بڑھا دیا گیا ہے اور اس کو اب کل صبح تک کر دیا گیا ہے۔ ادھر میٹرو خدمات بھی کل متاثر رہیں گی اور صرف ضرورت کے حساب سے ہی چلیں گی۔