منی پور میں شورش پسندوں نے ریاستی وزیر کے گھر پر گرینیڈ سے کیا حملہ، تحقیقات شروع، پولیس الرٹ
33
M.U.H
16/09/2024
منی پور میں جاری تشدد کے درمیان شورش پسندوں نے ریاستی حکومت کے ایک وزیر کے گھر کو نشانہ بنایا۔ حملہ کرنے والوں نے اخرل ضلع میں وزیر کاشم واشوم کے گھر پر گرینیڈ پھینکا جس سے گھر کی دیواریں اور کچھ حصے ٹوٹ گئے ہیں۔ غنیمت یہ ہے کہ حملہ کے وقت گھر پر کوئی رکن موجود نہیں تھا، ورنہ بڑا حادثہ سرزد ہو سکتا تھا۔
میڈیا رپورٹس کے مطابق حملے کی جانکاری ملنے کے بعد پولیس نے جائے وقوع پر پہنچ کر جانچ شروع کر دی ہے۔ ایک اعلیٰ افسر کا کہنا ہے کہ گرینیڈ کے ٹکڑے برآمد کر لیے گئے ہیں۔ اس حملے کے بعد سیکورٹی کے سخت انتظامات بھی کیے گئے ہیں۔ جانچ کے لیے آس پاس کے علاقوں کے سی سی ٹی وی فوٹیج کھنگالے جا رہے ہیں۔ یہ بھی جانکاری دی گئی کہ کسی نے بھی فی الحال اس حملے کی ذمہ داری نہیں لی ہے۔
قابل ذکر ہے کہ واشوم منی پور میں برسراقتدار بی جے پی کی معاون ’ناگا پیپلز فرنٹ‘ (این پی ایف) پارٹی کے رکن اسمبلی ہیں۔ اس درمیان پولیس نے توڑ پھوڑ کی سرگرمیوں میں شامل ہونے کا الزام عائد کر منی پور کے چراچاندپور ضلع کے 34 سالہ باشندہ کو گرفتار کیا ہے۔ منی پور پولیس کا کہنا ہے کہ نوجوان کو 13 ستمبر کے روز گواہاٹی کے بشسٹھا پولیس اسٹیشن کے ایس ٹی ایف نے گرفتار کیا تھا۔ نوجوان یونائٹیڈ کوکی نیشنل آرمی کا فنانشیل سکریٹری ہے۔ اس پر این ایچ 2 کے سپرمینا پل کو بم دھماکہ میں شامل ہونے کا الزام ہے۔ منی پور پولیس پہلے سے ہی اس معاملے میں آسام پولیس کے ساتھ مل کر کام کر رہی ہے۔