بھارت پر 100 فیصد ٹیرف کا خطرہ، پیٹر نوارو بولے- مودی اور ٹرمپ سلجھا لیں گے مسئلہ
9
M.U.H
12/08/2026
نئی دہلی: امریکہ کی جانب سے روس سے تیل اور قدرتی گیس خریدنے والے ممالک پر سخت تجارتی پابندیوں کی تجویز کے بعد بھارت پر 100 فیصد تک اضافی ٹیرف عائد ہونے کا خطرہ بڑھ گیا ہے۔ وائٹ ہاؤس کے تجارتی مشیر پیٹر نوارو نے کہا ہے کہ اس معاملے کا حل بھارتی وزیر اعظم نریندر مودی اور امریکی صدر ڈونلڈ ٹرمپ باہمی طور پر نکال لیں گے۔ انہوں نے دونوں رہنماؤں کے درمیان موجود اچھے ورکنگ ریلیشن شپ کا بھی حوالہ دیا۔نیوز ایجنسی اے این آئی کے سوال کا جواب دیتے ہوئے پیٹر نوارو نے لِنڈسے گراہم بل کے بھارت پر ممکنہ اثرات کے بارے میں کہا کہ صدر ٹرمپ اور وزیر اعظم مودی کے درمیان بہت اچھے کام کرنے والے تعلقات ہیں۔ دونوں اس مسئلے کو آپس میں حل کر لیں گے اور اس معاملے میں ان کا کوئی کردار نہیں ہے۔یہ سوال ٹرمپ کی حمایت یافتہ روس پابندیوں کے بل کے حوالے سے پوچھا گیا تھا، جس کے تحت روس سے خام تیل اور قدرتی گیس خریدنے والے بعض ممالک پر 100 فیصد تک ٹیرف عائد کیا جا سکتا ہے۔ اس فہرست میں بھارت اور چین سمیت روسی توانائی کے بڑے خریدار ممالک شامل ہیں۔
روسی تیل کی خریداری پر نوارو کا موقف
پیٹر نوارو نے بھارت کی روس سے تیل خریداری پر بھی اپنی تشویش کا اظہار کیا۔ انہوں نے کہا کہ تقریباً 6 سے 8 ماہ قبل انہوں نے ’فنانشل ٹائمز‘ میں ایک مضمون لکھا تھا، جس میں انہوں نے روس اور یوکرین جنگ کے تناظر میں بھارت کی روسی تیل کی خریداری کا ذکر کیا تھا۔نوارو کے مطابق، یوکرین پر روس کے حملے سے قبل بھارت روس کے ساتھ بڑے پیمانے پر تیل کی تجارت نہیں کرتا تھا، لیکن جنگ شروع ہونے کے بعد بھارت نے روس سے تیل کی خریداری میں نمایاں اضافہ کیا۔ ان کا دعویٰ ہے کہ روس سے حاصل کیے گئے خام تیل سے تیار ہونے والی ریفائنڈ مصنوعات کی تجارت نے بالواسطہ طور پر روس کی جنگی مشین کو مدد پہنچائی۔انہوں نے کہا کہ اس معاملے پر انہیں انٹرنیٹ پر بھارتی شہریوں کی جانب سے شدید تنقید کا بھی سامنا کرنا پڑا۔ نوارو نے کہا کہ امریکہ میں مسائل اس انداز سے حل نہیں کیے جاتے۔
سینیٹ میں بل منظور
واضح رہے کہ اس قانون کو ’روس پابندیوں کا بل‘ بھی کہا جا رہا ہے اور اسے مرحوم سینیٹر لِنڈسے گراہم کے نام سے منسوب کیا گیا ہے۔ گزشتہ ہفتے امریکی سینیٹ نے اسے دونوں جماعتوں کی حمایت سے 86 کے مقابلے میں 11 ووٹوں سے منظور کیا تھا۔ تاہم قانون بننے کے لیے اسے ایوان نمائندگان سے بھی منظوری حاصل کرنا ہوگی۔
پوتن اور غیر ملکی کمپنیوں پر بھی پابندی کا امکان
رپورٹس کے مطابق مجوزہ قانون صرف روس سے توانائی خریدنے والے ممالک تک محدود نہیں ہوگا بلکہ روسی حکومت کے اعلیٰ عہدیداروں اور روس کے دفاعی صنعتی شعبے کی مدد کرنے والی غیر ملکی کمپنیوں پر بھی پابندیاں عائد کی جا سکتی ہیں۔ روسی صدر ولادیمیر پوتن بھی ممکنہ پابندیوں کی زد میں آ سکتے ہیں۔روس سے توانائی خریدنے والے بڑے ممالک پر ٹیرف کی حتمی شرح امریکی تجارتی نمائندے جیمیسن گریئر طے کریں گے۔ تاہم بل میں ایسے ممالک کے لیے کچھ رعایتیں بھی موجود ہیں جو روس کی مجموعی قدرتی گیس برآمدات کا 15 فیصد سے کم درآمد کرتے ہیں اور روسی گیس پر انحصار کم کرنے کے لیے اقدامات کر رہے ہیں۔
