اپوزیشن جماعتیں اگنی ویر اسکیم پر سیاست کر رہی ہیں:مودی
98
M.U.H
26/07/2024
جموں: مرکز کے زیر انتظام علاقے لداخ کے دراس میں اپنے خطاب کے دوران وزیر اعظم نریندر مودی نے کہا کہ اگنی ویر اسکیم فوج کی طرف سے کی گئی ضروری اصلاحات کی ایک مثال ہے اور اپوزیشن پر الزام لگایا کہ وہ بھرتی کے عمل پر سیاست کر رہے ہیں جس کا مقصد مسلح افواج میں اوسط عمر کو کم رکھنا ہے۔
کرگل جنگ میں فتح کی 25 ویں سالگرہ کے موقع پر اپنے خطاب میں مودی نے کہا کہ کچھ لوگ قومی سلامتی سے متعلق ایک حساس معاملے پر سیاست کر رہے ہیں اور ان دعوؤں کو جھوٹا قرار دیا گیا ہے کہ اگنی ویر اسکیم پنشن کی رقم بچانے کے لئے شروع کی گئی ہے۔ اگنی ویر کا مقصد افواج کو جوان بنانا ہے ،اس کا مقصد فوجوں کو جنگ کے لئے مسلسل فٹ رکھنا ہے۔ بدقسمتی سے قومی سلامتی سے متعلق اس طرح کے حساس معاملے کو کچھ لوگوں نے سیاست کا موضوع بنایا ہوا ہے۔ فوج کی اس اصلاح پر بھی کچھ لوگ اپنے ذاتی مفادات کے لئے جھوٹ کی سیاست کر رہے ہیں۔ وزیر اعظم نے کہا کہ اگنی ویر اسکیم فوج کی طرف سے کی گئی ضروری اصلاحات کی ایک مثال ہے۔ کئی دہائیوں سے مسلح افواج کو جوان بنانے پر پارلیمنٹ اور مختلف کمیٹیوں میں بات چیت ہوتی رہی ہے۔ ہندوستانی فوجیوں کی اوسط عمر عالمی اوسط سے زیادہ ہونا ایک تشویشناک بات ہے۔
انہوں نے کہا کہ یہ مسئلہ کئی کمیٹیوں میں برسوں سے اٹھایا گیا لیکن قومی سلامتی کے اس چیلنج کو حل کرنے کی خواہش پہلے نہیں دکھائی گئی۔ انہوں نے کہا کہ ملک نے اگنی ویر اسکیم کے ذریعے اس تشویش کو دور کیا ہے۔ اپوزیشن کو نشانہ بناتے ہوئے مودی نے کہا کہ یہ وہی لوگ ہیں جنہوں نے فورسز میں ہزاروں کروڑ روپئے کے گھوٹالے کرکے ہماری افواج کو کمزور کیا۔ یہ لوگ نہیں چاہتے تھے کہ ہندوستانی فضائیہ کو جدید لڑاکا طیارے ملیں۔
وزیر اعظم نے ان دعوؤں کو بھی مسترد کر دیا کہ اگنی ویر اسکیم پنشن کی رقم بچانے کے لیے شروع کی گئی تھی۔کچھ لوگ یہ غلط فہمی بھی پھیلا رہے ہیں کہ حکومت پنشن کی رقم بچانے کے لیے یہ اسکیم لے کر آئی ہے۔ میں ایسے لوگوں سے پوچھنا چاہتا ہوں، آج کے بھرتی ہونے والوں کے لیے پنشن کا سوال 30 سال بعد اٹھے گا، حکومت آج فیصلہ کیوں کرے گی؟۔ جو لوگ ملک کے نوجوانوں کو گمراہ کر رہے ہیں تاریخ گواہ ہے کہ انہیں فوجیوں کی کوئی پرواہ نہیں۔ یہ وہی لوگ ہیں جنہوں نے 500 کروڑ روپئے دکھا کر ون رینک ون پنشن کا جھوٹ بولا۔ یہ ہماری حکومت ہے جس نے ون رینک ون پنشن کو لاگو کیا اور سابق فوجیوں کو 1.25 لاکھ کروڑ روپئے سے زیادہ فراہم کئے ۔