راہل گاندھی نے اچانک گاڑی رکوائی اور موچی کی دکان پر پہنچ گئے، موچیوں کے مسائل اور تکالیف پر ہوئی بات چیت
124
M.U.H
27/07/2024
لوک سبھا میں حزب اختلاف کے لیڈر اور کانگریس رکن پارلیمنٹ راہل گاندھی جمعہ کے روز ہتک عزتی معاملے میں اتر پردیش کے سلطان پور واقع ایم پی/ایم ایل اے کورٹ میں پیش ہوئے۔ اس دوران راہل گاندھی کی ایک ویڈیو سامنے آئی ہے جس میں وہ لکھنؤ ایئرپورٹ جاتے وقت راستے میں ایک موچی کی دکان پر رکے۔ اس دوران راہل گاندھی نے موچی سے کافی دیر تک بات چیت کی اور ان کے مسائل و تکالیف کو جاننے کی کوشش کی۔
کانگریس پارتی نے اپنے آفیشیل سوشل میڈیا اکاؤنٹ پر اس ملاقات کی ایک ویڈیو شیئر کرتے ہوئے لکھا ہے کہ ’’حزب اختلاف لیڈر راہل گاندھی نے راستے میں گاڑی رکوا کر موچی کا کام کرنے والے کنبہ سے ملاقات کی۔ ہم ان محنت کش لوگوں کے حقوق کے لیے لگاتار لڑ رہے ہیں۔ سڑک سے پارلیمنٹ تک ان کی آواز بلند کر رہے ہیں۔ ان کا حال محفوظ اور مستقبل خوشحال بنانا ہی ہمارا ہدف ہے۔‘‘
اس ویڈیو میں دیکھا جا سکتا ہے کہ راہل گاندھی سماعت کے بعد جب لکھنؤ ایئرپورٹ کے لیے روانہ ہو رہے تھے تبھی راستے میں ایک موچی کی دکان پر اپنی گاڑی رکواتے ہیں۔ اس ملاقات کی ویڈیو سوشل میڈیا پر وائرل ہو رہی ہے۔ اس سے قبل بھی راہل گاندھی نے اچانک دہلی کے جی ٹی بی نگر پہنچ کر ریہڑی پٹری والے دہاڑی مزدوروں سے ملاقات کی تھی۔ انھوں نے مزدوروں سے ان کے طرز زندگی اور روزگار سے جڑے مسائل کے بارے میں جانا تھا۔
بہرحال، رائے بریلی سے رکن پارلیمنٹ راہل گاندھی جمعہ کو ہتک عزتی معاملے میں ایم پی/ایم ایل اے کورٹ میں پیش ہوئے جہاں عدالت کے سامنے انھوں نے اپنا بیان درج کرایا۔ اسپیشل جج شبھم ورما نے اس معاملے میں بیان درج کرانے کے لیے راہل گاندھی کو 26 جولائی کو عدالت میں پیش ہونے کی ہدایت دی تھی۔ عدالت نے آئندہ سماعت کے لیے 12 اگست کی تاریخ مقرر کی ہے۔ راہل گاندھی کے وکیل کاشی پرساد شکلا نے بتایا کہ وہ پارلیمنٹ کی کارروائی چھوڑ کر عدالت میں پیش ہوئے ہیں اور اپنا بیان درج کرا دیا ہے۔