راہل گاندھی نے برسی کے موقع پر اندرا گاندھی کو خراج عقیدت پیش کیا، عوامی خدمات کے عزم کو مضبوط کرنے کی اپیل
15
M.U.H
31/10/2024
کانگریس کے سینئر رہنما اور لوک سبھا میں حزبِ اختلاف کے لیڈر راہل گاندھی نے اپنی دادی اور ہندوستان کی سابق وزیراعظم اندرا گاندھی کی برسی کے موقع پر انہیں خراج عقیدت پیش کیا۔ دہلی میں واقع شکتی استھل پر انہوں نے اندرا گاندھی کو یاد کرتے ہوئے ملک کی وحدت اور یکجہتی کے لیے ان کی قربانی کو خراج تحسین پیش کیا۔ انہوں نے سوشل میڈیا پلیٹ فارم ایکس پر پیغام لکھتے ہوئے کہا، ’’پنڈت جی کی اندو، باپو کی پریہ درشنی، نڈر، بے خوف اور انصاف پسند، ہندوستان کی اندرا! دادی، ملک کی یکجہتی اور سالمیت کے لیے آپ کی قربانی ہم سب کو ہمیشہ عوامی خدمات کی راہ پر آگے بڑھنے کا درس دیتی رہے گی۔‘‘
اندرا گاندھی کو ہندوستان کی واحد خاتون وزیراعظم ہونے کا اعزاز حاصل ہے۔ ان کا دورِ اقتدار 1966 سے 1977 تک اور پھر 1980 سے 1984 تک جاری رہا، جب اکتوبر 1984 میں انہیں ان کے ہی محافظوں نے گولی مار کر ہلاک کر دیا۔ ان کی برسی پر یادگار پیغام میں کانگریس صدر ملکارجن کھڑگے نے بھی ان کے غیرمعمولی لیڈرشپ اور دوراندیشی کی ستائش کرتے ہوئے کہا کہ اندرا گاندھی نے ہندوستانی سیاست میں طاقتور بصیرت اور ایک متحدہ ہندوستان کا خواب پورا کرنے کے لیے اپنی جان کی قربانی دی۔
اندرا گاندھی کی زندگی اور موت دونوں ہی میں ان کے کردار نے ہندوستانی معاشرت اور سیاست پر گہرے اثرات مرتب کیے ہیں۔ ان کی قیادت نے ہندوستان کے مختلف خطوں کو یکجا کرنے اور ملک میں فرقہ وارانہ ہم آہنگی کو فروغ دینے میں اہم کردار ادا کیا۔ ان کے فیصلے اور جدوجہد آج بھی بھارتی سیاست میں ایک قابل تقلید مثال سمجھے جاتے ہیں۔
دریں اثنا، راہل گاندھی نے ملک کے پہلے وزیر داخلہ سردار ولبھ بھائی پٹیل کو بھی خراج عقیدت پیش کیا۔ انہوں نے ایکس پر اپنے پیغام میں لکھا، ’’ملک کو یکجہتی اور سالمیت کی لڑی میں پروتے ہوئے ’مرد آہن‘ سردار ولبھ بھائی پٹیل کے ان کے یوم پیدائش پر خراج تحسین۔ ان کا ہندوستان کو متحد کرنے اور ملک میں پیار و بھائی چارہ قائم کرنے کا پیغام ہمیشہ ہماری رہنمائی کرے گا۔‘‘
