’نیٹ پی جی 2025‘ کا امتحان اب دو کی جگہ ایک شفٹ میں ہوگا، سپریم کورٹ نے سنایا فیصلہ
45
M.U.H
30/05/2025
’نیٹ پی جی 2025‘ کا امتحان پورے ملک میں اب ایک ہی شفٹ میں کرایا جائے گا۔ یہ امتحان 2 شفٹ میں منعقد کرنے سے متعلق شیڈیول جاری کیا گیا تھا، لیکن اس کے خلاف سپریم کورٹ میں عرضی داخل کی گئی تھی، اور آج عدالت نے عرضی گزار کے حق میں فیصلہ سنایا۔ 2 شفٹ میں امتحان منعقد کرنے کو چیلنج دینے والی عرضی پر سماعت کے دوران آج (30 مئی) سپریم کورٹ امتحان ایک شفٹ میں کرنے کا فیصلہ سنایا اور اس سلسلے میں متعلقہ بورڈ کو ہدایت بھی جاری کر دی۔
قابل ذکر ہے کہ ’نیٹ پی جی 2025‘ کا انعقاد 15 جون کو سی بی ٹی موڈ میں کیا جائے گا۔ جمعہ کے روز سپریم کورٹ نے نیشنل بورڈ آف اگزامنیشن (این بی ای) کو حکم دیا ہے کہ وہ اس امتحان کا انعقاد 2 شفٹ میں نہ کرے، بلکہ ایک شفٹ میں ہی اسے یقینی بنائے۔ عدالت نے این بی ای کو ہدایت دی ہے کہ وہ شفافیت یقینی بناتے ہوئے امتحان کو ایک ہی شفٹ میں منعقد کرنے کا انتظام کرے۔
عدالت نے اپنے فیصلے میں کہا کہ 15 جون کو ہونے والے امتحان کے لیے ضروری انتظام کرنے کے لیے اب بھی وقت بچا ہے۔ بورڈ کے پاس سنٹرس کی پہچان کے لیے بھی موافق وقت ہے۔ واضح رہے کہ نیٹ پی جی امتحان میں شامل ہونے والے طلبا کے لیے امتحان سٹی سلپ 2 جون کو جاری کی جائے گی۔ سٹی سلپ آفیشیل ویب سائٹ پر جاری نہیں ہوگی، بلکہ طلبا کے رجسٹرڈ ای میل آئی ڈی پر ’نیشنل بورڈ آف میڈیکل اگزامنیشن‘ سٹی سلپ بھیجے گا، جسے امتحان دہندگان بہ آسانی ڈاؤنلوڈ کر سکیں گے۔ علاوہ ازیں ایڈمٹ کارڈ امتحان کی تاریخ سے تقریباً 4 دن قبل جاری کیا جائے گا۔ ایڈمٹ کارڈ اگزامنیشن بورڈ کی آفیشیل ویب سائٹ natboard.edu.in پر جاری کیا جائے گا، جسے امتحان دہندگان ایپلی کیشن نمبر اور یومِ پیدائش کی تاریخ کا استعمال کر ڈاؤنلوڈ کر سکیں گے۔
