بی جے پی آئین سے سیکولرازم اور سوشلزم مٹانا چاہتی ہے، دلتوں و قبائلیوں کو لڑنا سیکھنا ہوگا: ملکارجن کھڑگے
37
M.U.H
11/07/2025
کانگریس کے صدر ملکارجن کھڑگے نے جمعہ کو بی جے پی حکومت پر سخت حملہ بولتے ہوئے کہا کہ مرکز میں برسراقتدار بھارتیہ جنتا پارٹی آئین سے ’سیکولرازم‘ اور ’سوشلزم‘ جیسے بنیادی اصولوں کو ختم کرنا چاہتی ہے۔ انہوں نے کہا کہ دلت، قبائلی اور نوجوان اگر اپنے حقوق کے لیے لڑنا نہ سیکھیں تو بی جے پی ان کا وجود مٹا دے گی۔
ملکارجن کھڑگے دہلی میں منعقدہ کانگریس کے "آئین بچاؤ سماویش" پروگرام سے خطاب کر رہے تھے۔ اپنے خطاب میں انہوں نے واضح طور پر کہا، ’’مرکز کی بی جے پی حکومت ہمارے آئین سے سیکولرازم اور سوشلزم کو ختم کرنا چاہتی ہے۔ یہ ایک خطرناک کوشش ہے، جس سے ملک کی جمہوریت اور سماجی ہم آہنگی کو شدید نقصان پہنچے گا۔‘‘
انہوں نے زور دے کر کہا کہ اگر دلت، قبائلی اور نوجوان طبقے اپنے حق کے لیے آواز بلند نہیں کریں گے اور مزاحمت نہیں کریں گے تو بی جے پی حکومت ان کے وجود کو ہی مٹا دینے کی سمت میں کام کرے گی۔
کھڑگے نے اوڈیشہ میں بی جے پی حامیوں کی جانب سے دلتوں اور سرکاری افسران پر ہونے والے مبینہ حملوں کا بھی ذکر کیا۔ ان کا کہنا تھا، ’’اوڈیشہ میں بی جے پی کے لوگ دلتوں اور سرکاری ملازمین پر حملے کر رہے ہیں اور حکومت خاموش تماشائی بنی ہوئی ہے۔ یہ سب ایک طے شدہ ایجنڈے کے تحت ہو رہا ہے۔‘‘
انہوں نے بی جے پی کی نجکاری پالیسی پر بھی تنقید کرتے ہوئے کہا، ’’جب کانگریس اقتدار میں تھی تو ہم نے ملک بھر میں 160 پبلک سیکٹر ادارے قائم کیے لیکن بی جے پی حکومت نے ان میں سے 23 اداروں کو نجی ہاتھوں میں بیچ دیا۔ یہ سرکاری وسائل کا منظم طور پر کارپوریٹس کے حوالے کیا جانا ہے۔‘‘
کانگریس صدر نے بی جے پی کے طرز حکمرانی کو عوام دشمن قرار دیتے ہوئے کہا کہ موجودہ حکومت چند صنعتکاروں کے مفاد میں پالیسیاں بنا رہی ہے، جبکہ ملک کے عام عوام کو ان کے حق سے محروم رکھا جا رہا ہے۔ انہوں نے کہا، ’’ہم اس ملک کے غریبوں، دلتوں، قبائلیوں، مزدوروں اور نوجوانوں کے حق کی بات کرتے رہیں گے۔ آئین ہمارا تحفظ کرتا ہے، اور جب تک کانگریس موجود ہے، ہم اس آئین کی حفاظت کے لیے آخری دم تک لڑیں گے۔‘‘
