یو این ایچ آر سی میں ہندوستان نے پاکستان کو خوب لگائی پھٹکار، مقبوضہ کشمیر خالی کرنے کی دی صلاح
17
M.U.H
24/09/2025
جنیوا میں اقوام متحدہ حقوق انسانی کونسل (یو این ایچ آر سی) کے 60ویں اجلاس میں ہندوستان نے پاکستان کی قلعی کھولتے ہوئے جموں و کشمیر کے ناجائز قبضہ والے علاقوں کو خالی کرنے کی صلاح دی ہے۔ پاکستانی سفارت کار کے ذریعہ ہندوستان کے خلاف بے بنیاد اور بھڑکاؤ بیان دینے کے بعد ہندوستانی سفارت کار چھتیج تیاگی نے پاکستان کو حقوق انسانی کی خلاف ورزی اور دہشت گردی کو فروغ دینے کے لیے جم کر نشانہ بنایا۔
اپنے بیان میں چھتیج تیاگی نے کہا کہ یو این ایچ آر سی کو غیر جانبدار اور غیر انتخابی ہونا چاہیے۔ انہوں نے کہا کہ کچھ چنندہ ممالک پر توجہ مرکوز کرنے سے دنیا کے سامنے آنے والی فوری اور مشترکہ چیلنجز سے دھیان بھٹکتا ہے۔
ہندوستانی سفارتکار نے پاکستان کی طرف اشارہ کرتے ہوئے کہا کہ ایک نمائندہ وفد جو اس نظریہ کے بالکل برعکس ہے، وہ ہندوستان کے خلاف بے بنیاد اور اشتعال انگیز بیان دے کر اس منچ کا غلط استعمال کر رہا ہے۔
انہوں نے پاکستان پر براہ راست حملہ کرتے ہوئے کہا، ’’ہمارے علاقے پر نظر رکھنے کے بجائے انہیں اپنے ناجائز قبضے والے ہندوستانی علاقے کو خالی کرنا چاہیے اور اپنی معیشت کو بچانے پر توجہ دینی چاہیے جو ’لائف سپورٹ‘ پر ہے۔‘‘
چھتیج تیاگی نے مزید کہا، ’’انہیں اپنی فوج کے غلبہ کو ختم کرنے اور انسانی حقوق کے ریکارڈ میں سدھار کرنا چاہیے جو استحصال سے داغ دار ہے۔ خاص کر تب جب انہیں دہشت گردی ایکسپورٹ کرنے، اقوام متحدہ کے ذریعہ ممنوع دہشت گردوں کو پناہ دینے اور اپنے ہی لوگوں پر بمباری کرنے سے فرصت ملے۔‘‘
اجلاس کے دوران ہندوستانی سفارت کار نے یہ بھی یاد دہانی کرائی کہ پاکستان کے بھیجے دہشت گردوں نے اس سال اپریل میں پہلگام میں بزدلانہ حملہ کیا۔ انہوں نے کہا کہ کیا ہم اُڑی کو بھول جائیں یا پھر ممبئی (حملے) کو بھول جائیں، ہندوستان اور پوری دنیا پاکستان کی ان حرکتوں کو نہیں بھولے گی۔
