آر ایس ایس کی صد سالہ تقریب میں جگدیپ دھنکھڑ مہمانِ خصوصی، کانگریس کا مودی حکومت پر طنز
12
M.U.H
15/10/2026
سابق نائب صدر جگدیپ دھنکڑ کو آئندہ ہفتے ناگپور میں ہونے والی آر ایس ایس کی عظیم الشان سالانہ تقریب میں بطور مہمان خصوصی مدعو کیا گیا ہے۔ یہ تقریب ہر سال وجے دشمی کے دن آر ایس ایس کے یوم تاسیس کو پیش نظر رکھتے ہوئے منعقد کی جاتی ہے۔ رواں سال 20 اکتوبر کو ناگپور کے ریشم باغ میدان میں ہونے والی یہ تقریب آر ایس ایس کی صد سالہ تقاریب کے اختتام کی علامت بھی ہوگا۔ آر ایس ایس نے بتایا ہے کہ آر ایس ایس کے سربراہ موہن بھاگوت اسے خطاب کریں گے۔ آر ایس ایس نے بتایا کہ اس سال سنگھ کی وجے دشمی تقریب اس کے صد سالہ تقاریب کے اختتام کی علامت ہے۔ اس تقریب میں سابق نائب صدر جمہوریہ جگدیپ دھنکھڑ اور مغربی و وسطی ہندوستان کے لیے اسرائیل کے قونصل جنرل یانیو ریواچ کو مدعو کیا گیا ہے۔
اس پروگرام میں دھنکھڑ کو مدعو کیے جانے پر کانگریس نے مودی حکومت پر طنز کرتے ہوئے کہا کہ یہ ایکو سسٹم خود ہی آپس میں لڑ رہا ہے۔ کانگریس کے جنرل سکریٹری جے رام رمیش نے کہا کہ اگرچہ دھنکھڑ کو آر ایس ایس کی جانب سے دعوت نامہ ملا ہے، لیکن حکومت نے ابھی تک انہیں وہ سرکاری رہائش الاٹ نہیں کی ہے، جس کے وہ حق دار ہیں، جبکہ انہوں نے گزشتہ سال جولائی میں اچانک استعفیٰ دے دیا تھا۔ دھنکھڑ نے طبی وجوہات کا حوالہ دیتے ہوئے ہندوستان کے نائب صدر اور راجیہ سبھا کے چیئرمین کے عہدے سے استعفیٰ دے دیا تھا۔
دھنکھڑ نے صدر جمہوریہ دروپدی مرمو کو لکھے اپنے خط میں کہا تھا کہ صحت کی دیکھ بھال کو ترجیح دینے اور طبی مشورے پر عمل کرنے کے لیے، میں آئین کے آرٹیکل 67 (اے) کے مطابق فوری طور پر ہندوستان کے نائب صدر کے عہدے سے استعفیٰ دے رہا ہوں۔ کانگریس نے دھنکھڑ کو ملنے والے دعوت نامے کو بنیاد بناتے ہوئے حکومت سے ان کے استعفے اور سرکاری رہائش الاٹ کیے جانے کے زیر التوا معاملے پر سوال اٹھائے ہیں، جبکہ آر ایس ایس نے کہا ہے کہ وہ اس کی سالانہ یوم تاسیس کی تقریب میں خصوصی مہمان کے طور پر شرکت کریں گے۔
