یونین بجٹ 2025: اب 12 لاکھ روپے تک کی آمدنی پر نہیں لگے گا انکم ٹیکس، متوسط طبقہ کو راحت دینے کی کوشش
18
M.U.H
01/02/2025
وزیر مالیات نرملا سیتا رمن نے آج عام بجٹ میں انکم ٹیکس کو لے کر متوسط طبقہ کو راحت دینے کی کوشش کی۔ بجٹ میں اعلان کیا گیا کہ 12 لاکھ روپے تک کی کمائی پر کوئی انکم ٹیکس نہیں دینا ہوگا۔ نئے رجیم کے تحت اس کی چھوٹ دی جائے گی۔ اس کے ساتھ ہی سیلری کلاس کو 75000 روپے کے اسٹینڈرڈ ڈِڈکشن کا فائدہ ملے گا۔ اس طرح اس کی کُل 12 لاکھ 75 ہزار روپے کی تنخواہ ٹیکس سے فری ہوگی۔ وزیر مالیات کا کہنا ہے کہ اس سے کھپت کو بڑھاوا ملے گا۔
وزیر مالیات نے ڈیئری اور فشری فارمرس کے قرض کی حد کو بڑھانے کا بھی اعلان کیا ہے۔ اس کے علاوہ ایم ایس ایم ای سیکٹر کا کریڈٹ کور بڑھانے کا اعلان کیا گیا ہے۔ انہوں نے کہا کہ بزرگوں کو ٹیکس کی چھوٹ کی حد دوگنی کر دی جائے گی۔ اس دوران نرملا سیتا رمن نے کہا کہ ہم دنیا کی سب سے تیزی سے بڑھنے والی معیشت ہیں۔ واضح ہو کہ اس سے پہلے نرملا سیتارمن 6 کُل وقتی اور 2 عبوری بجٹ پیش کر چکی ہیں۔
وزیر مالیات نے اپنی بجٹ تقریر میں کہا کہ اب چار سال تک اَپڈیٹ آئی ٹی آر بھرا جا سکے گا۔ اس کے علاوہ ٹی ڈی ایس پر ٹیکس کی چھوٹ کی حد 10 لاکھ ہوگی۔ اس سے پہلے 23 جولائی کو مودی حکومت کا بجٹ پیش کیا گیا تھا۔ آج بجٹ پیش ہونے کی وجہ سے ہفتہ کو بھی شیئر بازار کھلا ہوا ہے۔
