سویندو ادھیکاری کا اشتعال انگیز بیان، ’بی جے پی جیتے گی تو مسلم ایم ایل ایز کو اسمبلی سے باہر پھینک دیں گے‘
34
M.U.H
12/03/2025
مغربی بنگال میں حزب اختلاف کے رہنما اور بی جے پی کے سینئر لیڈر سویندو ادھیکاری نے ایک متنازع بیان دیتے ہوئے کہا ہے کہ اگر ان کی جماعت 2026 کے اسمبلی انتخابات میں کامیابی حاصل کرتی ہے تو وہ مسلم ارکان اسمبلی کو ’جسمانی طور پر باہر پھینک دیں گے۔‘ اس اشتعال انگیز بیان پر شدید ردعمل سامنے آیا ہے اور ترنمول کانگریس نے اسے ’نفرت انگیز‘ اور ’خطرناک‘ قرار دیا ہے۔
وزیر اعلیٰ ممتا بنرجی کی جماعت ترنمول کانگریس نے ادھیکاری کے بیان پر سخت احتجاج کیا اور اسے ’فرقہ واریت پر مبنی بیان‘ قرار دیا۔ پارٹی کے ترجمان کنال گھوش نے کہا کہ ایک منتخب نمائندے کے لیے ایسے اشتعال انگیز الفاظ کا استعمال انتہائی افسوسناک اور ناقابل قبول ہے۔
انہوں نے مزید کہا کہ ’’پارلیمنٹ اور اسمبلیوں میں بحث و مباحثہ ہو سکتا ہے لیکن کسی مخصوص برادری سے تعلق رکھنے والے ارکان اسمبلی کو نشانہ بنانا آئین کے اصولوں کے خلاف ہے۔ یہ بیان نہ صرف اشتعال انگیز اور خطرناک ہے بلکہ ایک مجرمانہ فعل بھی ہے۔‘‘
بی جے پی کی ریاستی قیادت نے ادھیکاری کے اس بیان پر کوئی تبصرہ نہیں کیا، تاہم پارٹی کے کئی رہنماؤں نے نجی طور پر اس بیان سے لاتعلقی کا اظہار کیا ہے۔
یہ پہلا موقع نہیں ہے جب سویندو ادھیکاری کے بیانات سے تنازع پیدا ہوا ہو۔ اس سے قبل 2024 کے لوک سبھا انتخابات میں بی جے پی کی ناقص کارکردگی کے بعد انہوں نے ’سب کا ساتھ، سب کا وکاس‘ کے نعرے کو مسترد کرتے ہوئے کہا تھا کہ ’ہم صرف ان کے ساتھ ہیں جو ہمارے ساتھ ہیں۔ ہمیں اقلیتی مورچہ کی ضرورت نہیں۔‘
