پاکستانی ہائی کمیشن کے لیے جاسوسی کے الزام میں دو افراد گرفتار
32
M.U.H
11/05/2025
چنڈی گڑھ:پنجاب پولیس نے اتوار کے روز دو افراد کو گرفتار کیا ہے جو مبینہ طور پر دہلی میں تعینات پاکستانی ہائی کمیشن کے ایک اہلکار کے لیے جاسوسی کی سرگرمیوں میں ملوث تھے۔پنجاب کے ڈائریکٹر جنرل پولیس (ڈی جی پی) گورو یادو نے کہا کہ معتبر انٹیلی جنس کی بنیاد پر ایک مشتبہ شخص کو گرفتار کیا گیا ہے جو بھارت کی فوجی نقل و حرکت سے متعلق حساس معلومات پاکستان میں موجود ایک ہینڈلر کو فراہم کر رہا تھا۔ڈی جی پی نے سوشل میڈیا پلیٹ فارم ایکس پر بتایا کہ تفتیش کے دوران ملزم کے انکشافات کی بنیاد پر ایک دوسرے سہولت کار کی بھی نشاندہی کی گئی جسے بعد میں حراست میں لے لیا گیا۔"
ابتدائی تحقیقات سے معلوم ہوا کہ ملزمان کو خفیہ معلومات فراہم کرنے کے بدلے آن لائن ٹرانزیکشنز کے ذریعے ادائیگیاں کی جا رہی تھیں۔ڈی جی پی کے مطابق، دونوں افراد ہینڈلر سے باقاعدہ رابطے میں تھے اور اس کی ہدایت پر مقامی نیٹ ورک کے دیگر افراد کو بھی فنڈز منتقل کر رہے تھے۔پولیس نے دو موبائل فون برآمد کیے ہیں اور ایف آئی آر درج کر لی گئی ہے۔ڈی جی پی یادو نے کہا کہ یہ کارروائی سرحد پار جاسوسی کے نیٹ ورکس کو ختم کرنے کی سمت ایک اہم قدم ہے اور قومی سلامتی کے تحفظ کے ہمارے عزم کی غماز ہے۔انہوں نے مزید کہا کہ مزید تحقیقات طے شدہ ضوابط کے مطابق کی جائیں گی جن میں مالی لین دین کے راستوں کا سراغ لگانا اور نیٹ ورک کے دیگر افراد کی شناخت شامل ہے۔
