عالمی کشیدگی کے درمیان حکومت کا نیا اعلان، خام تیل اور قدرتی گیس کا رائلٹی نظام تبدیل
18
M.U.H
12/05/2026
عالمی سطح پر بڑھتی جغرافیائی سیاسی کشیدگی اور توانائی سپلائی کے حوالے سے بڑھتے خدشات کے درمیان مرکزی حکومت نے تیل اور گیس سیکٹر میں بڑی پالیسی تبدیلی کی ہے۔ حکومت نے خام تیل اور قدرتی گیس اور کیسنگ ہیڈ کنڈینسیٹ کے لئے رائلٹی شرحوں اور ان کے حساب کے طریقہ کار کو معقول بنانے کا فیصلہ کیا ہے۔
پٹرولیم اور قدرتی گیس کے مرکزی وزیر ہردیپ سنگھ پوری نے سوشل میڈیا پوسٹ کے ذریعہ اس فیصلے کی معلومات دیتے ہوئے دعویٰ کیا کہ یہ قدم ہندوستان کے اپ اسٹریم سیکٹر کے نئے دور کی شروعات کرے گا۔ ان کے مطابق اس سے طویل وقت سے جاری پالیسی ساز تضادات ختم ہوں گے نیز تیل گیس کے شعبے میں سرمایہ کاری کو فروغ ملے گا۔
مرکزی وزیر کا یہ بھی کہنا ہے کہ ٓاو آر ڈی ایکٹ اور پی این جی قوانین میں 2025 میں کی گئی ترامیم کے بعد اب رائلٹی نظام کو بھی مزید آسان، شفاف اور یکساں بنایا گیا ہے۔ اس سے الگ الگ معاہدوں اور پالیسیوں میں موجود فرق ختم ہوں گے اور کمپنیوں کو واضح قوانین کے تحت کام کرنے میں آسانی ہوگی۔ حکومت کا کہنا ہے کہ نیا نظام سرمایہ کاروں کے لیے مستحکم اور موافق کاروباری ماحول فراہم کرے گا۔ اس سے گھریلو اور غیر ملکی کمپنیوں کا اعتماد مضبوط ہوگا اور ہندوستان میں تیل اور گیس کی دریافت اور پیداوار میں سرمایہ کاری تیز ہوسکتی ہے۔
حکومت کے فیصلے کے بعد دعویٰ کیا جارہا ہے کہ اب تیل اور گیس نکالنے والی کمپنیوں کو حکومت کو کتنا ادائیگی کرنا ہوگی اور اس کا شمار کیسے ہوگا، اس کے ضوابط پہلے کے مقابلے زیادہ واضح اور آسان ہوں گے۔ اس سے کمپنیوں کے لئے پالیسی سے متعلق غیر یقینی کم ہوگی۔ مرکزی وزیر نے اسے ہندوستان کے توانائی سیکٹر کو جدید بنانے کی سمت میں بڑا قدم بتایا۔ انہوں نے کہا کہ حکومت مشکل قوانین کی جگہ یکساں اور مسابقتی نظام کو نافذ کرنا چاہتی ہے جو عالمی معیار کے مطابق ہو۔
یہ فیصلہ ایسے وقت میں آیا ہے جب مغربی ایشیا میں جاری تنازعات کی وجہ سے عالمی توانائی بازار میں عدم استحکام بڑھ رہا ہے۔ اسی دوران وزیر اعظم مودی نے ہم وطنوں سے ایندھن بچانے اور توانائی بچت کی عادت ڈالنے کی اپیل کی ہے۔ وزیر اعظم نے عوامی نقل و حمل، صاف توانائی اور ضرورت پڑنے پر ورک فرام ہوم نیز ورچول میٹنگس جیسے متبادل کو اپنانے کی صلاح دی ہے تاکہ پٹرول اور ڈیزل کا خرچ کم ہوسکے۔ حکومت کا ماننا ہے کہ نیا رائلٹی نظام گھریلو پیدا وار بڑھانے اور ملک کی توانائی کی حفاظت کو مضبوط کرنے میں اہم کردار ادا کرے گا۔ حالانکہ جویلری اور پٹرولیم سیکٹر سے وابستہ ہزاروں افراد وزیر اعظم مودی کی اپیل کے خلاف احتجاج کرنے لگے ہیں۔
