شاہ خالد ایئرپورٹ، آرامکو کی تنصیبات اور ریاض پر یمن کا حملہ
16
M.U.H
08/11/2026
تہران :المسیرہ ٹیلی ویژن کے مطابق یمنی مسلح افواج کے ترجمان یحییٰ سریع نے اتوار کو ایک بیان جاری کیا جس میں چار فوجی آپریشنز کا اعلان کیا گیا۔
بیان میں کہا گيا ہے کہ فوجی آپریشنز کے دوران متعدد بیلسٹک میزائل، کروز میزائل اور ڈرونز کا استعمال کرتے ہوئے سعودی عرب کے اندر اہم اہداف اور یمن میں موجود سعودی حمایت یافتہ افواج کو نشانہ بنایا گیا۔
بیان میں کہا گیا ہے کہ یہ کارروائیاں یمن کے خلاف سعودی جارحیت اور عام شہریوں کی اموات کے جواب میں کی گئی ہیں۔
بیان کے مطابق، پہلے آپریشن میں دارالحکومت ریاض کے مختلف مقامات کو نشانہ بنایا گیا، جن میں شاہ خالد انٹرنیشنل ایئرپورٹ، تیل کمپنی 'آرامکو' (Aramco) کی ذخیرہ کرنے کی تنصیبات اور شہر کا مالیاتی مرکز (فنانشل ڈسٹرکٹ) شامل ہیں۔
یمنی مسلح افواج کے ترجمان نے زور دے کر کہا کہ یہ حملے براہ راست اور انتہائی درست تھے، جس کے نتیجے میں نشانہ بننے والے مقامات کو شدید نقصان پہنچا۔
دوسرے آپریشن میں 'ابقیق' (Abqaiq) کے علاقے میں آرامکو کی تنصیب کو نشانہ بنایا گیا؛ یہ حملہ براہ راست تھا جس کے نتیجے میں متاثرہ مقامات پر آگ لگ گئی۔
بیان میں مزید کہا گیا کہ تیسرے آپریشن میں صوبہ الجوف کے مشرقی حصے اور صوبہ مآرب کے ضلع 'مدغل' میں سعودی حمایت یافتہ افواج کے ایک اجتماع کو نشانہ بنایا گیا۔
چوتھے آپریشن میں صوبہ لحج کے علاقے 'المضاربہ' میں سعودی حمایت یافتہ افواج کے ٹھکانوں اور ان کے اجتماع کو نشانہ بنایا گیا، جن کی کمان ایک سعودی افسر 'بدر الحربی' کے پاس تھی۔
بیان میں "محاصرے کے بدلے محاصرہ اور کشیدگی کے بدلے کشیدگی" کی پالیسی کا اعادہ کیا گیا، اور سعودی حمایت یافتہ فوجیوں اور افسران کے مراکز کو مسلسل نشانہ بنانے پر زور دیا گیا۔
یمنی مسلح افواج کے ترجمان نے کہا کہ یمن کا محاصرہ ختم اور جارحیت بند کردی جائے تو ہم بھی اپنے حملے روک دیں گے۔
یہ بیان یمنی وزارت صحت کی جانب سے ہفتے کے روز کیے گئے اس اعلان کے بعد سامنے آیا ہے جس میں بتایا گیا تھا کہ صنعا کے علاقے 'الشریعہ' میں سعودی فضائی حملے کے نتیجے میں 33 یمنی شہری جن میں زیادہ تر خواتین اور بچے شامل تھے، شہید اور 39 دیگر زخمی ہو گئے۔
رپورٹس کے مطابق، اس حملے میں زخمی ہونے والوں میں 'المسیرہ' نیٹ ورک کے دو کیمرہ مین بھی شامل ہیں۔
یہ حملہ ایسے وقت میں ہوا ہے جب گزشتہ چند دنوں کے دوران سعودی عرب اور یمنی مسلح افواج کے درمیان جوابی حملوں میں شدت آئی ہے۔
اس کے ساتھ ساتھ، یمن کے اندر کئی محاذوں خاص طور پر تعز کے سیکٹر میں یمنی مسلح افواج اور سعودی حمایت یافتہ فورسز کے درمیان جھڑپیں جاری ہیں۔
