صیہونی فورسز نے مغربی کنارے میں فلسطینیوں کا قتل عام تیز کر دیا
21
M.U.H
03/02/2025
غزہ میں جنگ تھمی تو اسرائیل نے مغربی کنارے میں فلسطینیوں کا قتل عام تیز کر دیا۔ عرب میڈیا کے مطابق اسرائیل فورسز کی جنین میں نہتے فلسطینیوں پر شدید بمباری، فوجی آپریشن میں 16 سال کے لڑکے سمیت پانچ فلسطینی شہید ہوگئے، مغربی کنارے میں 24 سے زائد فلسطینی شہید جبکہ سیکڑوں زخمی ہوچکے۔ عرب میڈیا کا کہنا ہے کہ اسرائیلی جیلوں سے رہائی پانے والے فلسطینی قیدی اپنے پیاروں کے پاس پہنچ گئے، غزہ واپسی پر ظلوم فلسطینیوں کے چہروں پر خوشی اور غم کے ملے جھلے تاثرات ہیں، بیشتر فلسطینی بیمار اور اسرائیلی تشدد سے زخمی ہیں، ان کو فاقہ کشی میں رکھا گیا۔ فلسطینی قیدیوں نے کہا کہ اسرائیلی فوجیوں کی کوشش ہوتی تھی، ہم جیل میں ہی مرجائیں، کھانے کیلئے تین دن بعد سوکھی روٹی دی جاتی تھی، روزانہ مارا پیٹا جاتا تھا۔
دوسری جانب حماس کی جانب سے جاری بیان میں کہا گیا ہے کہ اسرائیل کا مغربی کنارے اور جنین کو ضم کرنے کا خواب پورا نہیں ہوگا، اسرائیل کے قبضے اور فلسطینیوں کو ان کی سرزمین سے بےدخلی کے ہتھکنڈے ناکام ہوں گے۔ ادھر عرب ممالک کے وزرائے خارجہ کا مشترکہ اجلاس ہوا، عرب ممالک نے بھی فلسطینیوں کی نقل مکانی کو مسترد کر دیا۔ عرب ممالک کے وزرائے خارجہ اجلاس کے مشترکہ اعلامیہ میں کہا گیا کہ حالات کو جواز بنا کر فلسطینیوں کو ان کی سرزمین سے محروم نہیں کیا جا سکتا، مصر اور اردن میں فلسطینیوں کی آبادکاری اور ٹرمپ منصوبے کیخلاف مشترکہ لائحہ عمل بنائیں گے۔
