’ہم سیکولر ہیں، بی جے پی کی تخریبی سیاست قابل مذمت‘، ممتا بنرجی نے عید کے موقع پر یکجہتی کی اپیل کی
35
M.U.H
31/03/2025
عیدالفطر کے موقع پر مغربی بنگال کی وزیر اعلیٰ ممتا بنرجی نے بی جے پی کی تخریبی سیاست کو ہدف تنقید بنایا۔ انھوں نے کولکاتا میں عیدگاہ پہنچ کر خطاب کرتے ہوئے کہا کہ ’’ہم سیکولر ہیں۔ نوراتری چل رہی ہے، میں اس کے لیے بھی نیک خواہشات پیش کرتی ہوں، لیکن ہم نہیں چاہتے کہ کوئی انارکی پھیلائے۔ عام لوگ انارکی نہیں پھیلاتے، بلکہ سیاسی پارٹیاں ایسا کرتی ہیں۔ یہ شرم کی بات ہے۔ ہم سبھی مذاہب کے لیے اپنی جان قربان کرنے کو تیار ہیں۔ اکثریتوں کی ذمہ داری اقلیتوں کی حفاظت کرنا ہے اور اقلیتوں کی ذمہ داری اکثریتوں کے ساتھ رہنا ہے۔‘‘
ممتا بنرجی نے پیر کے روز لوگوں سے گزارش کی کہ وہ ایسے اکساوے میں نہ آئیں جس سے فرقہ وارانہ فسادات بھڑک سکتے ہیں۔ انھوں نے اس بات پر زور دیا کہ ان کی حکومت ریاستی عوام کے ساتھ کھڑی رہے گی اور یہ یقینی بنائے گی کہ ریاست میں کوئی بھی کشیدگی پیدا نہ کر سکے۔ ترنمول کانگریس کی سربراہ ممتا بنرجی نے یہ بیان ’ریڈ روڈ‘ پر عید کی نماز کے بعد تقریب سے خطاب کرتے ہوئے دیا۔ انھوں نے کہا کہ ’’فساد بھڑکانے کے لیے اکسانے کی کوشش کی جا رہی ہے، برائے کرم اس کے جال میں نہ پھنسیں۔ مغربی بنگال حکومت اقلیتوں کے ساتھ کھڑی ہے۔ ریاست میں کوئی بھی کشیدگی پیدا نہیں کر سکتا۔‘‘
بی جے پی پر حملہ کرتے ہوئے ممتا بنرجی نے کہا کہ ’’اگر انھیں (بی جے پی کو) اقلیتوں سے مسئلہ ہے تو کیا وہ ملک کا آئین بدل دیں گے؟‘‘ انھوں نے بی جے پی کی تخریبی سیاست کے تئیں اپنی مخالفت ظاہر کرتے ہوئے کہا کہ وہ سبھی مذاہب کا احترام کرنے میں یقین رکھتی ہیں۔ وزیر اعلیٰ ’بی جے پی کی تخریبی سیاست‘ کو ایسی ’جملہ سیاست‘ کہا جس کا مقصد لوگوں کو تقسیم کرنا ہے۔
