پزشکیان: عالم اسلام کی وحدت سے امریکا اور صیہونی حکومت کی سازشیں بے اثر ہوجائیں گی
28
M.U.H
22/10/2025
تہران: صدر ڈاکٹر مسعود پزشکیان نے قومی سلامتی کے امور میں عراقی صدر کے مشیر سے ملاقات میں امریکا اور صیہونی حکومت کی سازشوں کو ناکام بنانے کے لئے اسلامی دنیا کے اتحاد کی ضرورت پر زور دیا ہے۔
منگل 21 اکتوبر کی شام،عراق کے قومی سلامتی کے مشیر قاسم الاعرجی نے تہران میں صدر ایران ڈاکٹر مسعود پزشکیان سے ملاقات کی ۔
صدر مملکت نے اس ملاقات میں، ایران اور عراق کے باہمی روابط کی ممتاز سطح پر قرار دیا اور کہا کہ اسلامی ملکوں کے باہمی اور دوجانبہ روابط کا فروغ، سیکورٹی، اقتصاد، سائنس اور ثقافت سبھی شعبوں میں باہمی تعاون میں توسیع پر منتج ہوسکتا ہے۔
صدر پزشکیان نے کہا کہ ایران اور عراق کے درمیان سفارتی وفود کے تبادلے اور اعلی حکام کی آمدورفت کا تسلسل، دوجانبہ، علاقائی اور بین الاقوامی مسائل میں مشترکہ نقطہ ںگاہ، یک جہتی اور تعاون بڑھنے کے اسباب فراہم کرسکتا ہے۔
صدر ایران نے اسلامی دنیا کے اتحاد کی ضرورت پر زور دیا اور کہا کہ اسلامی ملکوں میں اتحاد و یک جہتی پیدا ہوگئی تو علاقے کی اقوام کے خلاف امریکا اور صیہونی حکومت کی سازشیں ناکام ہوجائيں گی۔
انھوں نے اسلامی جمہوریہ ایران کے وحدت آفرین نقطہ نگاہ پر زور دیا اور کہا کہ ہم اپنے اعتقاد کے مطابق عراق اور کردستان ریجن کے سبھی عوام کو چاہے ان کا جس قوم وقبیلے اور مذہب ومسلک سے تعلق ہو، اپنا بھائی اور امت اسلامیہ کی عزت و سربلندی کے لئے برادرانہ روابط کی تقویت اور دشمنوں کے پیدا کردہ اختلافات سے پرہیز کو ضروری سمجھتے ہیں۔
عراق کے قومی سلامتی کے مشیرقاسم الاعرجی نے اس ملاقات میں صدر ایران سے ملاقات پر خوشی کا اظہار کیا اور کہا کہ ایران اورعراق کی سلامتی کو ایک دوسرے سے الگ نہیں کیا جاسکتا۔
انھوں نے کہا کہ حکومت عراق خود کو دونوں ملکوں کے سیکورٹی معاہدوں پر مکمل عمل درآمد کی پابند سمجھتی ہے۔
عراق کے قومی سلامتی کے مشیر نے کہا کہ عراق کے وزیر اعظم اور کردستان ریجن کے حکام کے مطابق ایران اور عراق کی سرحدوں کو اس خطے کی پر امن ترین سرحد ہونا چاہئے اور ایران کو عراق کی سرحدوں سے کوئی خطرہ لاحق نہیں ہوگا۔
