ایران کے تل ابیب پر میزائل حملوں نے آزاد انسانوں کے دل روشن کر دیے: ابوعبیدہ
6
M.U.H
13/03/2026
قسام بریگیڈ کے ترجمان ابوعبیدہ نے اعلان کیا ہے کہ ایران کے تل ابیب پر میزائل حملوں نے آزاد انسانوں کے دل روشن کر دیے اور امید کی کرن روشن کر دی ہے۔ حماس کے عسکری ونگ، قسام بریگیڈ کے ترجمان ابو عبیدہ نے یوم القدس کے موقع پر ایک بیان جاری کرتے ہوئے کہا کہ یوم قدس پر، ہم پاسداران انقلاب اسلامی کی طرف سے دشمن صیہونی حکومت کے خلاف کیے گئے میزائل حملوں کو خراج تحسین پیش کرتے ہیں اور ان کی قدر کرتے ہیں، یہ حملے اس حکومت کے خلاف مسلسل بمباری آپریشنز کے سلسلے کی ایک کڑی تھے اور جدید اور کلسٹر میزائلوں کے استعمال سے کیے گئے۔ ان حملوں نے ہماری امت کے فرزندوں کے زخمی سینوں کو تسکین بخشی، آزاد انسانوں کے دل روشن کیے اور تل ابیب کے آسمان کو روشن کرنے سے پہلے ہی دلوں میں امید کی کرن جلا دی۔
انہوں نے فلسطین کی حمایت میں ایرانی قوم کے لاکھوں افراد کے مارچ کا ذکر کرتے ہوئے مزید کہا کہ آج عظیم ایرانی قوم کے لاکھوں افراد کا، ان کے خلاف چھیڑی گئی دیوانہ وار جنگ کے باوجود، مسجد الاقصیٰ کی حمایت میں نکلنا اور رہنماؤں کا عوام کے ساتھ اتحاد اور وابستگی، فلسطین کی حمایت میں ان کے اصولی موقف کی ایک اور دلیل ہے۔ ابو عبیدہ نے یقین ظاہر کیا کہ جمہوریہ اسلامی، آیت اللہ سید مجتبیٰ خامنہ ای کی قیادت میں، اس راستے کو جاری رکھے گا جسے شہید آیت اللہ علی خامنہ ای نے اپنے خون سے کھینچا تھا۔قسام بریگیڈ کے ترجمان نے زور دے کر کہا کہ یوم القدس، جسے ہماری مسلمان امتوں نے فلسطین کی حمایت میں منایا، امت کی توانائیوں اور صلاحیتوں کو یکجا کرنے اور اس کی سمت کو اس کے بڑے اور بنیادی مسائل کی طرف موڑنے کا ایک موقع ہے۔ قدس غاصبوں کے جوتوں تلے کراہ رہا ہے اور مسجد الاقصیٰ نمازیوں سے خالی ہے۔ اور تمہارا اصل دشمن وہی صیہونی حکومت ہے جو تمہیں گھات لگائے بیٹھی ہے اور روز بروز ہماری امت کے خلاف اپنی جارحیت کا دائرہ وسیع کر رہی ہے۔
