مہاراشٹر ٹی ای ٹی پرچہ لیک: پرینکا گاندھی کا مودی حکومت پر حملہ، نوجوانوں سے آواز بلند کرنے کی اپیل
4
M.U.H
28/06/2026
مہاراشٹر اساتذہ اہلیت امتحان (ٹی ای ٹی) کا پرچہ لیک ہونے کے بعد کانگریس جنرل سکریٹری پرینکا گاندھی نے مودی حکومت پر سخت حملہ کرتے ہوئے نوجوانوں سے اپنے مستقبل کے تحفظ کے لیے آواز بلند کرنے کی اپیل کی ہے۔ انہوں نے کہا کہ جب تک نوجوان متحد ہو کر اپنی طاقت کا مظاہرہ نہیں کریں گے، تب تک ان کے مستقبل کے ساتھ اسی طرح کھلواڑ ہوتا رہے گا۔ ان کے مطابق مہاراشٹر میں ٹی ای ٹی کا پرچہ لیک ہونے کے بعد امتحان ملتوی ہونا نوجوانوں کے ساتھ ایک اور دھوکہ ہے۔
پرینکا گاندھی نے اپنی ایکس پوسٹ میں کہا کہ نیٹ، سی بی ایس ای، ایس ایس سی، سی یو ای ٹی اور اب ٹی ای ٹی جیسے امتحانات مسلسل تنازعات کا شکار ہو رہے ہیں۔ انہوں نے کہا کہ جب تک نوجوان تحریک کھڑی کرکے اپنی طاقت نہیں دکھائیں گے، تب تک بھارتیہ جنتا پارٹی کی حکومت اور وزیر اعظم نریندر مودی نوجوانوں کے تئیں جواب دہ نہیں ہوں گے۔ ان کے مطابق حکومت نہ امتحانات میں بدعنوانی پر قابو پا رہی ہے اور نہ ہی نوجوانوں کے مستقبل کی ذمہ داری قبول کر رہی ہے۔
انہوں نے ایکس پر لکھا، ’’نوجوانو، بیدار ہو جاؤ!!! جب تک تم اپنی آواز بلند نہیں کرو گے، تمہارے مستقبل کے ساتھ یہی ظلم ہوتا رہے گا۔ ایک بار پھر تمہارے ساتھ دھوکہ ہوا ہے۔ مہاراشٹر میں ٹی ای ٹی کا پرچہ لیک ہو گیا ہے اور امتحان ملتوی کر دیا گیا ہے۔‘‘
