’حکومت پارلیمنٹ میں اہم ایشوز پر بحث نہیں ہونے دے رہی‘، اپوزیشن کی آواز دبائے جانے پر پرینکا گاندھی فکرمند
43
M.U.H
29/03/2025
کانگریس جنرل سکریٹری اور رکن پارلیمنٹ پرینکا گاندھی اس وقت وائناڈ دورے پر ہیں۔ 3 روزہ دورے کے آخری دن انھوں نے نامہ نگاروں سے بات کرتے ہوئے مرکزی حکومت کو ہدف تنقید بنایا۔ انھوں نے الزام عائد کیا کہ برسراقتدار طبقہ پارلیمنٹ میں اہم ایشوز پر بحث نہیں ہونے دے رہا۔ کانگریس جنرل سکریٹری نے حکومت پر اپوزیشن کی آواز دبا کر جمہوری عمل کو کمزور کرنے کا سنگین الزام بھی عائد کیا۔
پرینکا گاندھی نے میڈیا کو بتایا کہ مرکزی حکومت کا نظریہ کسی بھی طرح سے اہم ایشوز پر بحث کو ٹالنا ہے۔ اس کے لیے برسراقتدار طبقہ کے اراکین پارلیمنٹ مختلف ہتھکنڈے اپنا رہے ہیں۔ اپوزیشن کی آواز مبینہ طور پر دبائے جانے سے متعلق سوال پر کانگریس لیڈر نے کہا کہ ’’حکومت نے پارلیمنٹ میں بحث کو روکا ہے۔‘‘ وہ مزید کہتی ہیں کہ ’’میں نے پارلیمنٹ کے گزشتہ کچھ اجلاس میں دیکھا ہے کہ ان کی (مرکزی حکومت کی) پالیسی کسی بھی طرح سے بحث کو ٹالنے کی ہے۔ چاہے وہ اپوزیشن کے ذریعہ احتجاج کیے جانے والے کسی ایشو کو اٹھانا ہو، یا پھر اپوزیشن کے لیڈر کو بولنے کی اجازت نہ دینا ہو۔‘‘
پرینکا گاندھی کا کہنا ہے کہ مرکزی حکومت پارلیمنٹ میں جمہوری عمل کو اثردار طریقے سے کام نہیں کرنے دے رہی۔ یہ اراکین پارلیمنٹ کے لیے انتہائی افسوسناک ہے۔ انھوں نے دعویٰ کیا کہ اپوزیشن پر اکثر پارلیمنٹ میں رخنہ ڈالنے کا الزام عائد کیا جاتا ہے، لیکن اس حکومت میں یہی طریقہ دیکھنے کو مل رہا ہے۔ حکومت خود ہی پارلیمانی کارروائی میں رخنہ اندازی کر رہی ہے، جو شاید سبھی کے لیے نئی بات ہے۔
