حماس نے اسرائیل پر راکٹ داغ دیئے، عسقلان میں نقصانات
14
M.U.H
07/04/2025
غزہ سے مقبوضہ فلسطینی علاقوں پر راکٹ حملے کے بعد مقبوضہ عسقلان میں نقصانات کی اطلاعات ہیں۔ اسرائیلی میڈیا کے مطابق غزہ سے اسرائیلی علاقوں کی جانب 10 راکٹ داغے گئے، جو کہ گذشتہ 10 ماہ کے دوران غزہ سے ہونے والا سب سے بڑا راکٹ حملہ ہے۔ فلسطینی مزاحمتی تنظیم حماس کے عسکری ونگ القسام بریگیڈز نے اس راکٹ حملے کی ذمہ داری قبول کی ہے۔ اسرائیلی فوج کے مطابق غزہ سے داغے جانے والے اکثر راکٹوں کو فضا میں ہی تباہ کر دیا گیا۔
اسرائیلی میڈیا کی جانب سے جاری کی جانے والی تصاویر اور ویڈیوز میں مقبوضہ شہر عسقلان میں راکٹ گرنے کے مناظر دکھائے گئے ہیں، جن میں تباہ شدہ گاڑیاں نظر آرہی ہیں۔ اسرائیل کی ریسکیو سروس کے مطابق راکٹ حملے کے نتیجے میں 3 افراد زخمی ہوئے ہیں۔ خیال رہے کہ اسرائیلی فوج نے 18 مارچ کو غزہ جنگ بندی معاہدہ توڑتے ہوئے غزہ پر بدترین بمباری شروع کر دی تھی، جس کے نتیجے میں 18 سے مارچ سے اب تک غزہ میں ایک ہزار سے زائد افراد شہید ہوچکے ہیں جبکہ 7 اکتوبر 2023ء سے اسرائیلی حملوں میں شہید ہونے والے فلسطینیوں کی تعداد 50 ہزار سے تجاوز کرچکی ہے۔
