امام عسکری (ع) کی حیات طیبہ میں ہدایت و تبلیغ کے نمونے

1399 M.U.H 25/10/2020

تحریر:مولانا سید شاہد جمال رضوی

الٰہی نمائندوں کا اولین فریضہ اور پہلا ہدف لوگوں کی ہدایت و تبلیغ ہے ، خداوندعالم نے ان کے کاندھوں پر تبلیغ کی ذمہ داری دے کر لوگوں کی ہدایت کا فریضہ عائد کیاہے ۔اسی لئے آپ حضرات نے اس اہم ترین فریضہ ٔ الہی کو عملی جامہ پہنانے کے سلسلے میں بے پناہ مشقتیں اور صعوبتیں برداشت کیں۔چنانچہ آدم سے لے کر حضرت خاتم صلی اللہ علیہ و آلہ تک اور حضرت خاتم سے کر آج تک کے ہادیان برحق کی زندگی و بندگی کا سرسری جائزہ بھی لیاجائے تو یہ بات نصف النہار کے سورج کی طرح واضح و آشکار ہوجاتی ہے کہ آپ حضرات نے ہدایت و تبلیغ کے سامنے اپنی ذات کو کبھی اہمیت نہیں دی ،مصائب و متاعب کے پہاڑ توڑے گئے ،بے پناہ مظالم ڈھائے گئے اورمشکلات و صعوبات کے دہانے کھولے گئے لیکن ان تمام صورت حال میں آپ حضرات کا مطمع نظر صرف یہ تھا کہ کچھ بھی ہو ہدایت و تبلیغ کا سلسلہ جاری و ساری رہنا چاہئے اور بس۔
امام حسن عسکری علیہ السلام کی حیات طیبہ بھی اس سے مختلف نہ تھی بلکہ آپ پر کچھ زیادہ ہی مصائب و آلام روا رکھے گئے اور آپ کی زندگی عجیب و غریب مصیبت کا نشانہ بنی جس کی مثال دوسرے معصومین اور انبیاء کی زندگیوں میں بھی نہیں ملتی ہے ۔ اس کا اہم ترین سبب یہ ہے کہ عالم اسلام نے رسول خدا(ص)سے یہ بات سن رکھی تھی کہ میرا بارہواں وارث وہ حجت خدا ہوگا جو ظلم و جور سے بھری ہوئی دنیا کو عدل و انصاف سے معمور کردے گا اور دنیا کے ہر نظام ظلم کا تختہ الٹ دے گا ۔ اسی لئے حکام وقت ہر دور میں اس نکتہ کی طرف متوجہ رہے کہ وہ مہدی دوراں منظر عام پر نہ آنے پائے ۔
امام حسن عسکری علیہ السلام کے دور تک یہ اطمینان تھا کہ مہدی اولاد حسین کا نواں ہوگا اور ابھی اولاد حسین کے آٹھ افراد پورے نہیں ہوئے ہیں لیکن امام عسکری کا دور آنے تک ہر صاحب علم و خبر کو یہ اندازہ ہوگیا کہ اب وجود مہدی (عج)کا دور قریب آگیاہے اور وہ انہیں کی اولاد میں ہوگا ۔ چنانچہ امام عسکری علیہ السلام کی خصوصی نگرانی شروع ہوگئی اور آپ کے گھر کے ساتھ وہی سلوک طے کرلیاگیا جو فرعون نے بنی اسرائیل کے ساتھ روا رکھاتھا ۔ صرف اس خوف سے کہ وہ فرزند دنیا میں نہ آنے پائے جو فرعون کے تخت و تاج کو تباہ و برباد کردے گا۔
حکام زمانہ کا اب تک یہ طریقۂ کارتھا کہ ائمہ طاہرین کو قید خانوں میں رکھتے تھے اور اگر قوم میں بغاوت کا خطرہ پیدا ہوگیایا پھرنگران قید خانہ کردار معصوم سے متاثر ہوکر منحرف ہونے لگا تو امام کو گھر میں نظر بند کردیالیکن امام عسکری کے ساتھ برتائو میں حکام کی پریشانی یہ بھی تھی کہ قید خانہ میں رکھیں تو وہی حشر ہوگا کہ تمام نگران زنداں امام کے کردار سے متاثر ہوجائیںگے ، دوسری طرف اگر گھر میں نظر بند کرنا چاہیں تو یہ خوف پیدا ہوتاہے کہ اس طرح وہ آخری حجت پروردگار منظر عام پر آجائے گا جس سے اپنے تخت و تاج کو خطرہ ہے ۔ چنانچہ ابتداء میں آپ کو قید خانے میں رکھاگیا اور داروغہ زنداں کو خصوصی ہدایت دی گئی کہ امام علیہ السلام کو زیادہ سے زیادہ اذیت دے لیکن جب دیکھ لیا کہ اس تاکید کا کوئی اثر نہیں ہورہاہے تو اپنے قصر کے ایک گوشہ میں نظر بند کردیا تاکہ اپنی نگرانی میں رہیں اور لوگوں میں کوئی حیثیت نہ پیدا کرنے پائیں لیکن جب یہ احساس ہوا کہ اس طرح قصر کے نگراں سپاہیوں کے بھی گرویدہ ہوجانے کا خطرہ ہے تو مجبور ہوکر حضرت کو ان کے گھر میں نظر بند کردیا گیا اور اس طرح خدائے موسی نے حضرت موسی علیہ السلام کی طرح فخر موسی کی ولادت باسعادت کا انتظام کردیا۔
متذکرہ پئے در پئے واقعات سے امام حسن عسکری علیہ السلام کے اوپر ڈھائے گئے مصائب و مظالم کا تھوڑا بہت اندازہ لگایاجاسکتاہے ، آپ کی پوری زندگی قید و بند میں گزری لیکن اس کے باوجود بھی آپ نے ہدایت و تبلیغ کا اہم ترین الہی فریضہ فراموش نہیں کیا اور زندگی میں جب بھی موقع ملالوگوں کو چشمۂ ہدایت و تبلیغ سے سیراب کرتے رہے ۔لیجئے امام علیہ السلام کی حیات طیبہ میں ہدایت و تبلیغ کے کچھ نمونے ملاحظہ فرمائیے :

١۔ نازش آفریں طفولیت اور مقصد ِتخلیق کا شعور
مورخین لکھتے ہیں کہ شہر سامراء میں بہلول نامی بزرگ ایک محلے سے عبور کررہے تھے ، انہوںنے وہاں کچھ بچوں کو کھیلتے ہوئے دیکھا ، وہیں آپ کی نظر ایک بچے''امام حسن عسکری علیہ السلام'' پر پڑی جو کچھ دور پر کھڑے ہوئے گریہ و زاری کررہے تھے۔ انہوں نے سوچا کہ امام اس لئے گریہ کررہے ہیں کہ دوسرے بچوں کے پاس کھیلنے کا سامان ہے اور ان کے پاس نہیں ہے۔انہوں نے امام علیہ السلام سے کہا: کیا میں آپ کے لئے کھیل کود کے اسباب فراہم کروں ...؟
امام نے فرمایا :آپ ہم سے ایسا سوال کیوں کررہے ہیں ،کیا ہم انسان کھیل کود کے لئے پیدا کئے گئے ہیں ؟
انہوں نے پوچھا : پھر آپ کی تخلیق کس لئے ہوئی ہے ؟
فرمایا :ہم علم و معرفت کی تعلیم اور پھر خداوندعالم کی عبادت کے لئے پیدا کئے گئے ہیں ۔
انہوں نے پوچھا: آپ نے یہ بات کہاں سے سیکھی ہے اور اس کی دلیل کیاہے؟
فرمایا :ہم نے خداوندعالم سے یہ بات سیکھی ہے ، اسی کا قرآن مجید میں ارشاد ہے :" کیا تمہارا خیال یہ ہے کہ ہم نے تمہیں بیکار پیدا کیاہے اور تم ہماری طرف پلٹا کر نہیں لائے جاؤگے ''۔(١)
جب بہلول نے بچہ کا یہ شعور و ادراک ملاحظہ کیاتو اپنی بزرگی بھول بیٹھے اور امام سے گزارش کی کہ مجھے موعظہ و نصیحت فرمائیں۔ امام نے پہلے بعض حکمت آمیز اشعار سنائے پھر فرمایا:
'' اے بہلو ل ! میں ایک دن اپنی والدہ کے پاس موجود تھا ، وہ کھانا پکانے کے لئے چولہے کے نیچے بعض بڑی اور ضخیم لکڑیاں ڈالے انہیں روشن کرنے کی کوشش کررہی تھیں لیکن ضخامت کی وجہ سے وہ روشن نہیں ہورہی تھیں اسی لئے انہوں نے پہلے بعض نازک اور چھوٹی لکڑیاں جلائیں تاکہ آسانی سے تمام لکڑیوں میں آگ لگ سکے ۔اے بہلول ! میرے گریہ و زاری کا سبب یہی ہے ، میں ڈرتاہوں کہ آخرت میں آتش جہنم کے لئے ہم چھوٹی اور نازک لکڑیوں کے مانند نہ ہوجائیں''۔(٢)

٢۔ واقعہ استسقاء میں آپ کی بصیرت
صاحب احقاق الحق کے علاوہ اہل سنت کے جید عالم ابن صباغ مالکی نے ابو ہاشم جعفری سے روایت کی ہے کہ ایک مرتبہ شہر سامراء میں سخت قحط پڑا ، خلیفہ وقت معتمد نے لوگوں کو حکم دیا کہ نماز استسقاء پڑھیں ۔ لوگ صحراء میں جاکر تین دن تک مسلسل نماز استسقاء پڑھتے رہے لیکن بارش نہیں ہوئی۔ چوتھے روز عیسائیوں کا راہنما '' جاثلیق '' راہبوں کے ساتھ صحرا پہونچا ، ایک راہب نے جب دعا کے لئے ہاتھ بلند کیا تو فوراً بارش ہونے لگی ۔ دوسرے دن بھی اس نے ایسا ہی کیا ، اتنی بارش ہوئی کہ لوگوں کو پانی کی ضرورت نہ رہی ۔ اس واقعہ سے لوگوں کے دلوں میں شکوک و شبہات ابھرنے لگے اور وہ مسیحیت کی طرف راغب ہونے لگے ۔ یہ بات خلیفہ وقت کو ناگوار گزری اس نے امام حسن عسکری علیہ السلام کے پاس آدمی بھیج کر قید خانے سے بلوایا ۔
خلیفہ نے امام سے کہا: یہ آپ کے جد کی امت ہے ، وہ گمراہ ہو رہی ہے اور آپ ہی گمراہی سے بچا سکتے ہیں ۔
امام علیہ السلام سے فرمایا : جاثلیق اور اس کے راہبوں سے کہو کہ منگل کے روز پھر صحراء آئیں۔
چنانچہ خلیفہ کے حکم سے منگل کے دن سب لوگ جمع ہوئے ۔ امام عسکری علیہ السلام بھی مسلمانوں کے ہمراہ وہاں تشریف لائے ۔ عیسائیوں اور راہبوں نے طلب بارش کے لئے ہاتھ اٹھایا اور آسمان ابر آلود ہوگیا اور بارش ہونے لگی ۔
امام نے حکم دیا کہ فلاں راہب کے ہاتھ میں جو چیز ہے اسے لے لو۔ راہب کے ہاتھ میں کسی انسان کی سیاہ فام ہڈی تھی ۔ امام نے وہ ہڈی لے لی اور ایک کپڑے میں لپیٹ دی اور راہب سے فرمایا : اب بارش کے لئے دعا کرو۔ راہب نے دعا کے لئے ہاتھ اٹھایا لیکن آسمان پر موجود بادل بھی چھٹ گئے ، آسمان صاف ہوگیا اور سورج نظر آنے لگا۔ لوگ حیرت سے امام کو دیکھ رہے تھے ۔
خلیفہ نے امام سے دریافت کیا : یہ ہڈی کیسی ہے ؟
امام نے فرمایا :یہ ایک پیغمبر خدا کے جسم کا ٹکڑا ہے جس کو انہوںنے انبیاء کی قبروں سے حاصل کیاہے جب یہ ہڈی زیر آسمان آتی ہے تو فوراً بارش ہونے لگتی ہے ۔
پھر امام آگے آئے اور آپ نے بارگاہ خداوندی میں دست دعا بلند کئے ، ابھی دعا ختم بھی نہ ہونے پائی تھی کہ آسمان سے رحمت خدا کی بارش ہونے لگی ۔اس طرح لوگوں نے ہدایت پائی اور گمراہی سے محفوظ رہے ۔(٣)

٣۔ ایک گمراہ فلسفی کی ہدایت و تبلیغ
عراق کے مشہور فلسفی '' اسحاق کندی '' نے تناقضات القرآن لکھنا شروع کیا اور آیات کو یکجا کر کے یہ ثابت کرنا شروع کیا کہ قرآن مجید کے بیانات میں تضاد پایاجاتاہے اور وہ ایک مقام پر ایک بیان دیتاہے اور دوسرے مقام پر اس کے بالکل برعکس بولتاہے حالانکہ یہ بات قرآن کریم کی شان تنزیل کے قطعی برخلاف ہے ۔
ایک دن اس کا ایک شاگرد امام حسن عسکری علیہ السلام کی خدمت میں حاضر ہوا ، امام نے اس سے دریافت کیا کہ تمہارے درمیان کوئی معقول شخص ہے جو تمہارے استاد کو اس بے مقصد اور عبث کام سے منع کرے۔
اس نے کہا: ہم ان کے شاگرد ہیں ، ہم کس طرح ان پر اعتراض کرسکتے ہیں ؟
امام نے فرمایا : اچھا یہ بتاؤ جو باتیں میں تمہیں بتائوں کیا تم اس تک پہونچا دوگے۔
اس نے کہا: ہاں ۔
فرمایا : اس کے پاس جائو اور اس سے بہت زیادہ نزدیکی بڑھائو ، جو کام وہ کہے اس میں اس کی مدد کرو ، جب بہت زیادہ قربت اور اعتماد حاصل کرلو تو اس سے کہو : ایک سوال میرے ذہن میں ہے اگر آپ اجازت دیں تو آپ کی خدمت میں عرض کرو ں؟تمہیں سوال کی اجازت دے گا ، اس وقت اس سے کہو کہ اگر قرآن کا بیان کرنے والا آپ کے پاس آئے تو کیا آپ یہ احتمال نہیں دیں گے کہ قرآنی الفاظ سے اس نے وہ مفہوم مراد نہیں لیاہے جو آپ سمجھ رہے ہیں۔
وہ کہے گا : ہاں ! اس بات کا احتما ل تو پایاجاتاہے ۔ چونکہ اسحاق کندی ہر بات کو غور سے سنتا اور درک کرتاہے اسی لئے جب وہ تمہارے سوال کا مثبت جواب دے تو اس وقت کہو: آپ کو یہ یقین کس طرح حاصل ہوگیا کہ قرآنی الفاظ سے وہی معنی مراد لئے گئے ہیں جو آپ سمجھ رہے ہیں ، ہوسکتاہے قرآن کا مفہوم کچھ اور ہو اور جس تک آپ کی رسائی نہ ہوسکی ہو آپ قرآنی الفاظ و عبارت کو دوسرے معانی و مفاہیم کے سانچے میں ڈھال رہے ہوں۔
امام کی تمام باتیں غور سے سننے کے بعد وہ شخص اسحاق کندی کے پاس پہونچا اور جس طرح امام نے فرمایا تھا اسی طرح پیش آیا ۔ آخر ایک دن اس نے اپنا سوال اسحاق کندی کے سامنے پیش کیا ۔ اسحاق نے اس سے سوال دہرانے کو کہا۔ پھر اس نے ہر جہت سے غور و فکر کرنے کے بعد اپنے شاگرد کو قسم دے کر پوچھا:یہ سوال تمہارے ذہن میں کس نے ایجاد کیاہے ...؟
شاگرد نے کہا: بس ایسے ہی میرے ذہن میں یہ سوال آگیا ۔
اس نے کہا: یہ سوال تمہارے ذہن کی پیداوار نہیں ہوسکتی ، تمہارے جیسے افراد کے ذہنوں میں اس طرح کے سوال نہیں آسکتے ، بتائو یہ سوال تمہیں کس نے تعلیم دئیے ۔
اس نے تمام حقیقت بیان کی تو اسحاق کندی نے برجستہ کہا:اس طرح کی گفتگو اس گھرانے کے علاوہ کوئی نہیں کرسکتا ۔ اور یہ کہہ کر اس نے اپنے سارے نوشتہ جات کو نذر آتش کردیا۔(٤)
متذکرہ واقعہ سے جہاں امام حسن عسکری علیہ السلام کی علمی برتری و افضلیت واضح ہوتی ہے وہیں یہ بھی آشکار ہوتاہے کہ رسول خدا صلی اللہ علیہ و آلہ نے اہل بیت و قرآن کو ایک دوسرے سے وابستہ و منسلک کیوں قرار دیاتھا ۔ آنحضرت نے اتنی بڑی امت مسلمہ اور اتنی کثیر صحابہ کرام کی جماعت کے باوجود عترت و اہل بیت سے تمسک کا حکم اسی لئے دیاتھا کہ امت کے پاس تعلیم و تعلم کا علم ہے اور اس کا علم استاد اور مدرسہ کا مرہون منت ہے اور استاد و مدرسہ کا علم بہر حال ظاہری معانی تک ہی محدود رہتاہے ۔ اہل بیت طاہرین وہ افراد ہیں جنہیں خداوندعالم نے الہام و القاء کے ذریعہ حقائق و معارف سے آگاہ کیاہے اور وہ مراد الہی سے باخبر ہیں لہذا ان کے بیان کردہ معانی میں تضاد اور اختلاف کا کوئی امکان نہیں ہے ۔
امام حسن عسکری علیہ السلام کی قید و بند سے مملو زندگی میں ہدایت و تبلیغ کے دوسرے اوربھی بہت سے نمونے ملاحظہ کئے جاسکتے ہیں ، آپ نے کبھی سوال و جواب ، کبھی خط و کتابت اور کبھی اپنے زریں اقوال کے ذریعہ لوگوں کی ہدایت کا سامان فراہم کیاہے ؛ آخر میں حسن ختام کے بطور صرف ایک حدیث ہدیۂ قارئین کی جارہی ہے :
امام فرماتے ہیں :لیس من الادب اظھار الفرح عند المحزون '' کسی غم رسیدہ کے سامنے خوشی کا اظہار کرنا ادب و تہذیب کے خلاف ہے''۔(٥)
متذکرہ جملہ میں جہاں ایک انتہائی اہم ترین اخلاقی نکتہ کی طرف اشارہ کیاگیاہے وہیں ایک درد دل کا بھی اظہار کیاگیاہے جس کا احساس اسی انسان کو ہوسکتاہے جو ایسے حالات سے گزررہاہو جہاں اس پر مصائب کا ہجوم ہو اور دنیا اس کے غم میں ہمدردی کرنے کے بجائے تفریحات میں مشغول ہو۔
آخر میں خداسے دعا ہے کہ معبود ! ہمیں صحیح معنوں میں معصومین کے اقوال پر عمل کرنے کی توفیق کرامت فرما؛آمین یا رب العالمین

حوالہ جات
١۔ مومنون ١١٥
٢۔ احقا ق الحق ج١٢ ص ٤٧٣
٣۔ احقاق الحق ج١٢ ص ٤٦٤؛ الفصول المہمہ
٤۔ مناقب ابن شہر آشوب ج٣ ص ٣٢٥
٥۔ انوار البہیہ ، مطبوعہ مشہد ص ا١٦٠

مذہبی

امام عسکری (ع) کی حیات طیبہ میں ہدایت و تبلیغ کے نمونے

اہم لنکس

حالیہ پوسٹس

مفید سائٹس

رابطہ