امام خمینی اور مہاتماگاندھی دونوں ہی فکری اور عملی طور پر نام نہاد ظاہری آزادی پر باطنی آزادی کو ترجیح دینے کے قائل تھے چنانچہ جہاں گاندھی جی کے افکار میں روح کو جسم پر فوقیت حاصل ہے اور خدمت خلق ہی خالق سے قربت اور انسانی شرف و تکامل کے حصول کا واحد ذریعہ تھا وہیں عارف باللہ امام خمینیؒ نے بھی ہمیشہ اس بات پر تاکید کی کہ چونکہ اللہ ایک ہے اور سارے انسان ایک دوسرے کے اعضا و جوارح ہیں لہذا ہمیں بشری وقار اور معنوی آزادی تب ہی میسر آسکتی ہے جب ہم اللہ کے سامنے سراپا تسلیم رہیں۔ گاندھی جی نے جہاں ہندوستان کی آزادی اور جمہوری نظام کی داغ بیل ڈالنے کے بعد خود کو اور اپنے خانوادہ کو حکومتیں ، مناصب اور شاہانہ تزک و احتشام سے دور رکھا تاہم ایسے کسی مقام کو قبول نہیں کیا جہاں اختیارات کے غلط استعمال کا امکان ہو وہیں امام خمینیؒ کے یہاں یہ شیوہ بدرجہ اتم موجود ہے چونکہ آپ نے نہ صرف انقلاب اسلامی کے بعد کوئی منصب قبول نہیں کیا بلکہ اپنے بچوں کے لئے بھی وصیت کردی کہ انہیں حکومت میں کوئی منصب نہ دیا جائے یہیں نہیں بلکہ دنیا نے دیکھا کہ اسلامی انقلاب سے قبل اور اسلامی انقلاب کے بعد کی معیار معیشت میں امام خمینی کے یہاں ذرہ برابر تبدیلی نہیں آئی تاہم اگر اواخر میںقم سے تہران قیام پذیر ہوئے تو وہ بھی علاج کی خاطر تاکہ بار بار قم سے تہران کی سفری صعوبتوں سے محفوظ رہا جائے۔ اس سلسلے میں یہ بات قابل ذکر ہے کہ آج بھی امام خمینیؒ کا گھر محفوظ ہے جس کو دیکھ کر کوئی بھی اس رہبر کبیر کی سادہ زیستی کا اندازہ لگا سکتا ہے۔

ایران و ہند کے انقلاب کے روح رواںدونوں عبقری رہبروں کی روش زندگی سے یہ بھی اندازہ ہوتا ہے کہ دونوں ہی اس بات پر شدت سے عمل پیرا تھے کہ ہر قسم کی اصلاح کی شروعات خود سے ہوتی ہے، قربانیوں کا آغاز اپنی ذات سے ہوتا ہے اپنی قوم و ملت کو ظلم و استبداد کے چنگل سے آزاد کرانے کے لئے پہلے خود ہوا و ہوس سے مبرّا ہونا پڑے گا۔ ان رہبروں نے ہمیں سکھایا کہ صرف وہ لوگ جو اپنے نفس پر تسلط رکھتے ہیں لوگوں پر حکومت کرسکتے ہیں۔ علاوہ ازیں، مجموعی طور پر یہ کہا جاسکتا ہے کہ مغربی نظام اور اس کے بے ارزش اقدار کی نفی و تردید دونوں ہی رہبروں کے یہاں قدر مشترک کی حیثیت رکھتا ہے جیسا کہ زمانے نے دیکھا گاندھی جی نے لندن میں تدوین شدہ ضوابط کو ہندوستان پر تھوپنے سے روکا وہیں امام خمینی نے واشنگٹن میں تصویب شدہ قواعد کو ایران میں نافذ ہونے سے باز رکھا چنانچہ جہاں ہندوستان میں جمہوری نظام کی تشکیل نے ہندوستان سے برطانوی تاج و سامراج کو تاراج کیا وہیں امام خمینی نے سرزمین ایران پر اسلام اور جمہوریت کے حسین امتزاج کو پیش کرکے امریکہ کی بالادستی کے ہاتھ قلم کردیئے۔

خاص بات یہ ہے کہ ایران و ہند کے انقلاب و آزادی کے دونوں سرخیل کبھی بھی دین کو سیاست سے الگ نہیں جانتے تھے یہی نہیں بلکہ ان کی دینی دیانتداری نے ہی ان کو خدمت خلق کے لئے میدان سیاست  میں عملی طور پر آنے پر تحریک بخشی جیسا کہ گاندھی جی نے کہا تھا کہ ’میری سیاست اور دیگر تمام فعالیت میری دین سے ہی وابستہ ہیں‘۔ جب کہ امام خمینیؒ نے فرمایا تھا: ہماری سیاست ہی عین دیانت ہے۔

دونوں ہی رہبروں نے مغربی ڈیموکریسی کو اپنا نمونۂ عمل نہیں قرار دیا بلکہ اپنے اپنے ممالک میں آزادی اور انقلاب کے بعد جمہوریت کو نت نئے معنی و مفہوم عطا کئے۔ در اصل یہ دونوں بزرگان ایک نئے ہند و ایران کے معمار ہیں شاید یہ ان کے اخلاص کا نتیجہ ہے کہ آج ان دونوں ملکوں کے عوام ایسے تہذیبی و ثقافتی رشتوں سے جڑے ہوئے ہیں جس کی مثال دنیا کے دیگر ملکوں میں ملنا مشکل ہے۔