موجودہ صورتحال کے خلاف مزاحمت کا مستقبل

1168 muh 15/10/2019

عادل فراز

گذشتہ دنوں مجھے دہلی کا سفر درپیش ہوا۔اُسی دن لکھنؤ کے لئے واپسی طے تھی ۔ضروری امور سے فراغت کے بعد ریلوسے اسٹیشن پہونچا تو معلوم ہواٹرین کے پلیٹ فارم پر آنے میں کافی وقت ہے ۔وقت گذاری کے لئے ایک بُک اسٹال کا رخ کیا کہ شاید کوئی اچھی کتاب ہاتھ آجائے ۔سفر میں فرصت کے لمحوں کو بامقصد بنانے کے لئےمیرے نزدیک کتاب سے بہتر کوئی متبادل نہیں ہے ۔بک اسٹال پر متعدد کتابیں ،رسائل اور اخبارات موجود تھے ۔کچھ کتابوں کو اُلٹ پلٹ کر دیکھا مگر کوئی ایسی کتاب نظر نہیں آئی جس کا موضوع فوراََذہن کو اپنی طرف متوجہ کرلے ۔تبھی ایک کتاب پر نظر پڑی جس کے سرورق پر مہاتما گاندھی کے ساتھ ناتھورام گوڈسے کی تصویرنظر آرہی تھی ۔کتاب کا نام تھا ’’ میں نے گاندھی کا وَدھ کیوں کیا۔‘‘ کتاب کے مصنف تھے گوپال گوڈسے ۔میں نے کتاب کے کچھ صفحات کو وہیں کھڑے کھڑے پڑھا اور واپس اسٹال پر رکھدیا ۔میں نے اسٹال کے مالک سے سوال کیا ’’بھیا کیا ایسی کتابوں کےبیچنے پر ریلوے انتظامیہ یاحکومت کی طرف سے کوئی پابندی نہیں ہے‘‘۔ اس نے مسکراتے ہوئے جواب دیا ’’ بھیا کیاان کتابوں کو ہم چھاپتے ہیں ؟۔جب ہندوستان میں ایسی کتابیں چھپ رہی ہیں تو ہم بیچ رہے ہیں۔اور پھر ہمارا تودھندہ کتابیں بیچنا ہے ۔اس میں کیا چھپاہے اس سے ہمیں کچھ لینا دینا نہیں ‘‘۔مجھےاس کے جواب میں کوئی دلچسپی نہیں تھی مگر ایک سوال اسی وقت میرے ذہن میں کلبلانے لگا ۔آخر جب ہمارے دیش میں مہاتما گاندھی کے قاتل کےنظریات کو فروغ دےرہی کتابیں کھلے عام بک سکتی ہیں تو کیا موجودہ نظام کے خلاف آواز اٹھانے والے افراد کی آزادیٔ اظہار پر قدغن کیوں؟‘‘۔کیا کشمیر کی موجودہ صورتحال پرحکومت سے سوال کرنااورہندوستان میں پیش آنے والے ہجومی تشدد کے واقعات پر وزیراعظم کوخط لکھ کراپنی تشویش کا اظہارکرنا،ناتھو رام گوڈسےکے نظریات کو فروغ دینے سے بھی بڑا جرم ہے ؟۔اس سوال کی کوکھ سےکئی اور سوال جنم لیں گے جن کا جواب موجودہ سیاسی نظام کی کوکھ سے باہر آچکاہے ،بس ان کو سمجھنے کی ضرورت ہے ۔
گاندھی کے ملک میں اگر گوڈسے کی حمایت میں کھلے عام بیانات دیےجارہے ہوں توپھر گاندھی جی کےملک میں دیگرافراد کو اظہارکی کتنی آزادی ہونی چاہئے؟۔مگر یہ آزادی سلب ہوتی جارہی ہے کیونکہ گاندھی کےقاتل ملک پراپنا تسلط جماچکے ہیں ۔گاندھی جی کےنظریات کو بالائے طاق رکھ کے انہی کے نام پران کےدشمنوں اور قاتلوں کے نظریات کو فروغ دیا جارہاہے ۔افسوس ناک صورتحال یہ ہے کہ یہ سب کچھ’راشٹرواد ‘‘ کے نام پر ہورہاہے اور ’اندھے بھکت‘یہ سمجھنے سے بھی قاصر ہیں کہ انہیں گاندھی کے دیش میں گاندھی کے خلاف ہی لاکرکھڑاکردیا گیاہے ۔زیادہ ترنئی نسل کومہاتما گاندھی کے افکارونظریات سے کوئی دلچسپی نہیں ہے کیونکہ انہیں گاندھی جی کی زندگی سے بے خبر رکھا جارہاہے ۔نصاب میں تبدیلی کی جارہی ہے اور زعفرانی افکارونظریات کو تاریخ کے نام پر نصاب میں شامل کرنے کی مہم چھڑی ہوئی ہے ۔ان سازشوں سے جوپردہ اٹھانے کی کوشش کرتاہے ’گوری لنکیش‘ کی طرح اس کابہیمانہ قتل کردیا جاتاہے یا پھرپورے میڈیا ہائوس کوہی خرید لیا جاتاہے ۔اگر کچھ زندہ دل افراداس صورتحال کے خلاف آواز احتجاج بلند کرتےہیں تو ان کی آواز کو دبانے کے لئے طاقت کا بیجا استعمال کیا جاتاہے ۔یعنی گاندھی جی کے دیش میں ان کے قاتل کے افکارونظریات کی تشہیرو ترویج پر پابندی نہیں ہے مگر گاندھی جی کے نقش قدم پر چلتے ہوئے ظلم و تشدد کے خلاف آواز اٹھانےوالوں کو بالکل اظہار کی آزادی نہیں ہے۔
اس حقیقت کو تسلیم کرنے میں ہی بھلائی ہے کہ اب ہندوستان میں اظہار رائے کی آزادی کو پوری طرح ختم کردیاگیاہے ۔چونکہ ہم جیسے چند افراد نے ابھی تک یہ بارور نہیں کیاہے لہذا موجودہ صورتحال کے خلاف لکھنے کی جرأت کررہے ہیں ۔وہ حکومت جو آمریت اور یک طرفہ فیصلوں کے دم پر ہو اس کے لئے اظہار رائے کی آزادی سب سے زیادہ خطرناک ثابت ہوسکتی ہے، اس لئے موجودہ حکومت نے اظہار کے تمام ذریعوں اور وسائل پر یا تو پوری طرح قدغن لگادیاہے یا انہیں خرید لیاہے ۔برقی میڈیا اس کی واضح دلیل ہے جہاں پروپیگنڈہ نیوز کی بھرمار ہے اور پیڈ پروگرام نشر کئے جارہے ہیں۔ان چینلوں پر ہمیں خبروں کی جگہ ایک ایسی صورتحال سے روبرو کرایا جارہاہے جس کا خارج میں کوئی وجود ہی نہیں ہے۔مگر چونکہ ان پیڈچینلوں نے ایسا بیانیہ تیار کیاہے کہ ہم سفید جھوٹ کو بھی سچ ماننے کے لئے مجبور ہیں کیونکہ ہمارے پاس حقیقت تک پہونچنے کے صحیح وسائل موجود نہیں ہیں یا پھر ہم ان وسائل کو آزمانے کے عادی نہیں ہیں۔دونوں اعتبار سے موجودہ صورتحال اپنے خطرناک ترین دور میں داخل ہوچکی ہے ۔
ہندوستان میں آئے دن ہورہے ماب لنچنگ کے واقعات پر جن سماجی شخصیات نے وزیر اعظم کو خط لکھ کر موجودہ صورتحال پر تشویش کااظہار کیا تھا ان کی آواز دبانے کی بھی کوشش کی گئی ۔ان شخصیات پر ایف آئی آر دائر کی گئی تاکہ آئندہ کوئی وزیر اعظم کو خط لکھنے کی جرأت نہ کرسکے ۔ایف آئی آر درج کرانے والے شخص کا دعویٰ تھاکہ ان کے خط لکھنے سے بین الاقوامی سطح پر وزیر اعظم کی شبیہ داغدار ہوئی ہے ۔مگر اس نے یہ واضح نہیں کیاکہ ہندوستان میں اقلیتوں پر ہورہے پر تشد د واقعات اور ان پر وزیر اعظم کی خاموشی سے کیا عالمی پیمانے پر ملک کی سیکولر شبیہ کو نقصان نہیں پہونچاہے؟اس کی وضاحت اس لئے بھی ممکن نہیں ہے کیونکہ وزیر اعظم کو خط لکھنے والی شخصیات پر ایف آئی آر کرانے والے شخص کا تعلق تلاش کرنے کے بعد کسی نا کسی ایسی تنظیم سے ضرور نکلے گا جو پرتشدد واقعات میں شامل رہتی ہیں ۔اس کی زندہ مثال نوین دلال ہےجس نے جے این یو طالب علم عمر خالد پر۱۳ اگست ۲۰۱۸ کو جان لیوا حملہ کیا تھا مگر شیوسینا نے اسے الیکشن میں بہادر گڑھ سے ٹکٹ دیکر یہ ثابت کردیاہے کہ ایسے شدت پسند عناصر کو انکی سرپرستی حاصل ہے ۔
مہاتما گاندھی بین الاقوامی ہندی یونیورسٹی، وردھا مہاراشٹر کے ایس سی اور اوبی سی کیٹگری کے کچھ طالب علموں نے بھی ہجومی تشدد پر وزیر اعظم کو خط لکھ کر تشویش کا اظہار کیا تھا ۔یہ طلباء کشمیر کی تازہ صورتحال پر مذاکرہ رکھنا چاہتے تھے لیکن انہیں اس کی اجازت نہیں دی گئی ۔سزا کے طورپران تمام طالب علموں کو یونیورسٹی نے معطل کردیا تھا ۔حالانکہ اب انکی معطلی کافیصلہ واپس لے لیا گیا ہے مگر کیا ملک کی موجودہ صورتحال پر وزیر اعظم کو خط لکھنا اتنا بڑا جرم ہے کہ سزا کے طوپر طلباء کے مستقبل کو دائوں پر لگادیا جائے؟۔ کیا آزاد اور سیکولر ہندوستان میں کشمیر کی موجودہ صورتحال پر مذاکرہ رکھنا اور کشمیریوں کے مسائل پر تبادلۂ خیال کرنا بھی جرم ہے ؟ ہندوستان میں یہ صورتحال کبھی نہیں رہی ۔سیاسی آمریت کا شکار تو کانگریس بھی تھی مگر اس نے کبھی خود پر تنقید کرنے والوں کے خلاف اتنا سخت مؤقف اختیار نہیں کیا کہ اظہار کی آزادی ہی سلب کرلی جائے ۔
اس صورتحال سے نمٹنے کے لئے ضروری ہے کہ نوجوان نسل کو ہندوستان کی سیکولر روح سے روشناس کرایا جائے ۔انہیں مہاتما گاندھی کےافکارونظریات سے پوری طرح باخبر کرنے کی مہم چلائی جائے کیونکہ مہاتما گاندھی کی حیات کو سمجھے بغیر ہمارا نوجوان گوڈسے اور اس کےحامیوں کے خلاف کھڑاہونے کی جرأ ت نہیں کرے گا ۔حالات کی فکرکرنا جواں مردوں اور آزادمنش افراد کا شیوہ کبھی نہیں رہا ۔حالات کو بدلنے کے لئے حالات سے لڑنا بیحد ضروری ہے ۔ہمیں امید ہے کہ بہت جلد مزاحمت کی یہ بکھری ہوئی آوازیں ایک منظم شکل اختیار کریں گی اور حالات میں برقی تبدیلیاں رونماہونگی ۔انہی بکھری ہوئی آوازوں کے درمیان سے کوئی پراعتماد قائد بن ابھر کرہمارے سامنےآئے گا۔کیونکہ موجودہ مسلم قیادت کاچہرہ مسخ ہوچکاہےاورانہوںنے اپنے ضمیروں کو علی الاعلان نیلام کردیاہے ۔اس لئے ہمیں ان سے کوئی توقع نہیں رکھنی چاہئے ۔

سیاسی

موجودہ صورتحال کے خلاف مزاحمت کا مستقبل

اہم لنکس

حالیہ پوسٹس

مفید سائٹس

رابطہ