وسیم رضوی کے پیچھے کون؟

798 M.U.H 22/03/2021

تحریر: فاروق احمد

قرآن مجید اللہ تعالی کی اپنے آخری رسول پر نازل کردہ آخری آسمانی کتاب ہے۔ اس کے کتاب اللہ ہونے میں اگر کسی کو ذرہ برابر بھی شک ہو تو اس کے لئے آج بھی یہ چیلنج موجود ہے کہ وہ اپنے تمام حواریوں و ماریوں کے ساتھ مل کر اس کتاب کی آیات جیسی ایک بھی آیت بنا کر دکھا دے، خدا کی اس کتاب کا چیلنج ان لوگوں کے لئے بھی رہا جو خود کو اہل زبان اور باقی دنیا کو گونگا پکارتے رہے۔ قرآن ہی ہے جس نے اس بات کی گواہی دی ہے کہ خدا نے ہو قوم میں اپنے نبیوں کو بھیجا تھا اور پہلے بھی آسمانی صحیفے نازل کئے تھے لیکن وہ صحیفے اپنی اصل شکل میں موجود نہیں رہے۔ اگر قرآن ان صحیفوں کی تصدیق نہیں کرتا تو ان کے حق میں آج کوئی تحریری ثبوت نہیں ہوتا۔ اسی طرح قرآن نے بہت سارے تاریخی حقائق کے لئے بھی ثبوت فراہم کیا۔ اس میں کوئی شک نہیں کہ آج مسلمان اس قرآن پر پوری طرح عمل نہیں کرتے ہیں لیکن یہ اس کا اعجاز ہی ہے کہ مسلمانوں کی لاکھ بے عملی کے باوجود بھی آج لوگ صرف قرآن پڑھ کر اسلام قبول کر رہے ہیں۔ خدا نے قرآن کو نازل کیا تھا تاکہ لوگ اپنے پیدا کرنے والے کے احکامات کو مان کر اس دنیا کو امن کا گہوارہ بنا دیں۔ ہر طرف ظلم و ناانصافی اور عصبیت و نفرت کا خاتمہ ہو۔ قرآن باقاعدہ اعلان کرتا ہے کہ ایک انسان کا بھی ناحق قتل پوری انسانیت کا قتل ہے اور فتنہ و فساد تو قتل سے بھی زیادہ گھناؤنا جرم ہے۔ البتہ قرآن کہتا ہے کہ جب کوئی ناحق تمہاری جان و مال اور عزت و آبرو کے در پہ آجائے اور کوئی چارہ کار نہ رہ جائے تو انصاف کا تقاضا ہے کہ اپنا دفاع کرو۔ ذرا سوچئے کہ جس قرآن کی تعلیمات سے ترغیب پاکر دنیا میں انسانی حقوق کا چارٹر تشکیل پاتا ہو، اس قرآن پر دہشت گردی کے فروغ کا الزام بغیر سر پر کے نہیں تو اور کیا ہے۔ ماضی میں ایسے واقعات ہوئے ہیں کہ قرآن کے بڑے ناقدین نے بھی جب صدق دل سے قرآن پڑھا تو اسلام کو مانے بغیر نہ رہ سکے۔ پھر کیا وجہ ہے کہ شاذ و نادر اکا دکا لوگ ایسے نکل آتے ہیں جو قرآن کے سلسلے میں بے بنیاد باتوں کو ہوا دینے کی کوشش کرتے ہیں ؟ اس کی چند بڑی وجوہات یہ ہیں کہ وہ اسلام اور مسلمانوں کے سلسلے میں پہلے سے ہی منفی ذہنیت رکھتے ہیں۔ قرآن کی آیتوں کے ان کے پس منظر سے الگ کرکے دیکھتے ہیں۔ محض نکتہ چینی اور افتراپردازی کی غرض سے قرآن کی بعض باتوں کو آدھا ادھورا پیش کرتے ہیں۔ یا اپنے افکارو نظریات کو بہتر بتانے یا ان کی خامیوں پر پردہ ڈالنے کے لیے قرآنی احکامات کو غلط ڈھنگ سے پیش کرتے ہیں۔ کچھ لوگ ایسے بھی ہوئے ہیں جو قرآن پر عبور نہیں رکھتے، اس کے معانی و مفاہیم سے کسی حد تک نابلد ہوتے ہیں یا اپنی کم علمی و ااحساس کمتری کے سبب قرآن پر انگلی اٹھا دیتے ہیں۔ قرآن پر انگلی اٹھانے والوں میں وہ لوگ بھی شامل ہیں جو طاغوتی نظام فکر کے حاملین کا آلۂ کار ہیں اور اپنے مسلم نام و خاندانی پس منظر کا فائدہ اٹھا کر اہل ایمان کو گمراہ کرنے اور بدلے میں کچھ ذاتی فائدہ حاصل کرنے کے لئے ایسا کرتے ہیں۔ یا پھر اپنے مجرمانہ ریکارڈ اور بدعنوانی و ناانصافی کے معاملوں میں سزا سے بچنے کے لئے طاغوتی نظام کا سہارا لیتے ہیں۔ ایسے لوگ دشمنان اسلام کا آلۂ کار بن کر اسلامی اصولوں پر انگلیاں اٹھاتے ہیں یا اسلام اور مسلمانوں کو بد نام کر کے اپنا الو سیدھا کرتے ہیں۔

اس وقت اترپردیش شیعہ وقف بورڈ کے سابق چیئرمین وسیم رضوی نے جو فتنہ کھڑا کیا ہے دراصل اسی کا ایک نمونہ ہے۔ ہمارا ملک ایک جمہوری ملک ہے یہاں سب کو مذہبی آزادی کا بنیادی حق حاصل ہے۔ وسیم رضوی نے آئینی حق کی خلاف ورزی کرتے ہوئے سپریم کورٹ میں قرآن کی بعض آیات کو ہٹانے سے متعلق جو معاملہ اٹھایا ہے وہ خود عدالت کے آئینی دائرہ اختیار سے بالاتر ہے۔

رہی بات وسیم رضوی کی تو وہ اسلام اور مسلمانوں کا کس قدر دشمن ہے اس کی ماضی کی سرگرمیوں سے اس کا اندازہ بخوبی لگایا جاسکتا ہے۔ وسیم رضوی کے خلاف ظلم، جبر اور بدعنوانی کے مجرمانہ معاملات، سی بی آئی کی انکوائری اور ہر وقت جیل جانے کا خوف اُس کے ذہنی دیوالیہ پن کا ایک دیگر سبب بھی ہو سکتا ہے۔۔ بہرکیف وسیم رضوی کے سلسلے میں امت مسلمہ نے بلا تفریق مسلک و مکتبِ فکر جو متحدہ موقف اختیار کیا وہ قابل ستائش ہے۔وسیم رضوی کے گھر والوں نے بھی اس سے اپنا رشتہ ختم کر لیا ہے۔ اس سلسلے میں اس کے بھائی کا ایک ویڈیو بھی سوشل میڈیا میں گردش کر رہا ہے۔ جس اس بات کا صاف اشارہ موجود ہے کہ وسیم رضوی کچھ لوگوں کی ایما پر ایسا کر رہے ہیں۔ امید ہے کہ ملت کا ہر فرد صبر کا مظاہرہ کرتے ہوئے وسیم رضوی جیسے لوگوں سے برأت کا اظہار کرے گا۔ کیوں کہ ہر کسی کو معلوم ہے کہ ملک میں اہم مسائل سے دھیان بھٹکانے، مسلمانوں کو مشتعل کرکے ان کے خلاف کارروائی کرنے اور سیاسی فائدے کے لئے ایک خاص طبقے کو خوش کرنے کے لئے تنگ نظر افکار کے حاملین جاہل، ناسمجھ ،لالچی، سماج دشمن عناصر اور غلط کاموں میں ملوث افراد کو اپنا آلہ کار بنا کر سماج کو توڑنے کے لئے اور ملک میں بدامنی کا ماحول بنانے کے لئے اس طرح کو معاملوں کو ہوا دیتے ہیں۔

رہی بات سپریم کورٹ میں اس کے معاملے کی تو جس طرح سے ملت کی تمام بڑی جماعتوں اور اداروں نے ماضی میں اس کے اشتعال انگیز سوالات پر کوئی توجہ نہیں دی اور اس کے موقف کی تائید نہیں کی اور نہ اس کو قابل اعتنا سمجھا، کورٹ میں بھی وہ اس معاملے میں الجھنا پسند نہیں کریں گے اور سپریم کورٹ سے بھی امید ہے کہ وہ اس غیر آئینی و غیر قانونی معاملے کو فورا خارج کرنے کے ساتھ ، عدالت کو ایک غیرضروری مسئلے میں الجھانے اور فتنہ کھڑا کرنے کی کوشش کے جرم میں وسیم رضوی جیسے لوگوں کے خلاف سخت کاروائی بھی کرے گی۔

یہاں ایک بات اور بھی گوش گزار رہنی چاہئے کہ قرآن میں تحریف کی کوئی کوشش نہ کبھی کامیاب ہوئی ہے اور نہ ہوگی۔ ایسا نہیں ہے کہ وسیم رضوی نے کوئی نیا معاملہ اٹھایا ہے بلکہ اسلام دشمن عناصر اور بدخواہوں نے پہلے بھی ایسا کیا ہے لیکن قرآن میں ایک زیر اور زبر تک کی تحریف ممکن نہیں ہو سکی۔ بلکہ مسلمانوں نے اتحاد کا مظاہرہ کیا اور ایسے لوگوں سے رشہ و ناطہ ترک کر لیا۔ اس وقت مسلمانوں کو آپسی اتحاد کا مظاہرہ کرتے ہوئے قرآن سے رشتہ مزید گہرا کرتے ہوئے اپنی پسماندگی و زبوں حالی کا حل تلاش کرنا چاہئے تاکہ وہ ملک اور قوم کی ترقی و سلامتی کو یقینی بنانے میں اہم کردار ادا کرسکیں۔

سیاسی

وسیم رضوی کے پیچھے کون؟

اہم لنکس

حالیہ پوسٹس

مفید سائٹس

رابطہ