ہندوستان میں قومیت کی بنیادیں اور سوال

406 m.u.h 25/01/2023

تحریر:عادل فراز

سنگھ اپنی عادت کے مطابق ہمیشہ مسلمانوں کی قومیت پر سوال اٹھاتارہاہے ۔اس کے نزدیک ہندوستان کے تمام باشندے ہندو ہیں ۔اس بنیاد پر وہ ’ہندوراشٹر‘ کے قیام کا مطالبہ کرتے رہتے ہیں ،جبکہ سنگھ اس حقیقت کی پردہ پوشی کرتارہاہے کہ ہندوستان کے اصل باشندے کون ہیں؟سوال یہ نہیں ہے کہ ہندوستان کا قدیم باشندہ کون ہے کیونکہ قومیت کی قدامت کی بنیاد پر کسی کو ہندوستان کا اصل باشندہ تسلیم نہیں کیا جاسکتا ۔اس طرح تو آریائی اور ان کے بعد دیگر قومیں جو ہندوستان میں فاتح کی حیثیت سے داخل ہوئیں ،سب کو ہندوستان کا اصل باشندہ تسلیم کرنا پڑے گا۔سوال یہ ہے کہ آریوں سے پہلے ہندوستان میں کونسی قومیں آباد تھیں اور کیا آج ان قوموں کا وجودہے؟آیا آریوں سے پہلے ہندوستان کی سرحدوں میں داخل ہونے والی قوموں کو ہندوستان کا اصل باشندہ کہاجائے گا یا پھر مقامی باشندوں کی تاریخ پر مزید تحقیق کی جانی چاہیے۔دوسرا اہم سوال یہ ہے کہ آریوں سے پہلے جو قومیں ہندوستان میں آباد تھیں کیا آج بھی وہ اپنے قدیم تشخص کے ساتھ موجود ہیں ؟ان سوالوں کے جوابات محققین اور مورخین بھی یقین کے ساتھ نہیں دے سکے البتہ آرایس ایس، جس کی اپنی الگ سائنسی تحقیقات ہیں ،ان سوالوں کے جواب دینے پر قادر ہے ۔یہی وجہ ہے کہ وہ تمام ہندوئوں کو ہندوستان کا اصل باشندہ گردانتےہیں جبکہ یہ تحقیق طلب ہے کہ ہندوئوں میں بھی کونسی قومیں اور ذاتیں آریوں کی یلغار سے محفوظ رہ گئی تھیں ۔محققین کے مطابق ہندوستان کی ویدی تہذیب آریوں کی پروردہ ہے ،جس کے اثرات آج تک باقی ہیں ۔سنگھ کے سربراہ موہن بھاگوت کو مسلمانوں کی قومیت پر سوال اٹھانے سے پہلے اپنی قومیت اور ہندوئوں کی قومی قدامت پر بھی گفتگو کرنی چاہیے ۔ظاہر ہے وہ ایسانہیں کریں گے کیونکہ اس سے یہ ثابت ہوگا کہ جس طرح مسلمان باہر سے ہندوستان میں داخل ہوئے اسی طرح ہندوئوں کی اکثریت بھی فاتح قوم کی حیثیت سے ہندوستان میں وارد ہوئی تھی ۔مقامی باشندوں کو فاتح قوموں نے غلام بنالیا اور انہیں تمام انسانی حقوق سے محروم کردیا ۔محرومیت کا یہ سلسلہ آج تک جاری ہے ۔
ہند آریائی جنوبی روس کی وسیع چراگاہوں میں بسنے والے چرواہے تھے ۔وسطی ایشیا میں ان کی تہذیب کا پھیلائو کئی ہزار سالوں پر محیط ہے ،جس پر مسلسل تحقیق کی جارہی ہے ۔آریوں کی ہندوستان کی طرف ہجرت تاریخ میں متنازع رہی ہے ۔(تفصیل کے لئے ملاحظہ ہو ’قدیم ہندوستان کی تاریخ ۔رما شنکر ترپاٹھی ۔ص۵۲)بعض تو اس با ت کا قطعی انکار کرتے ہیں کہ آریہ تاریخ کے کسی موڑپر ہجرت کرکے ہندوستان کی سرحدوں میں داخل ہوئے تھے ۔البتہ اکثر محققین اس بات کو تسلیم کرتے ہیں کیونکہ آریوں کی ہجرت کے شواہد ’ویدوں ‘ کی شکل میں ہمارے درمیان موجود ہیں ۔اس عہد کے تنہا تاریخی شواہد ’وید‘ ہیں ۔سنسکرت کی یہ مذہبی تحریریں اوستاآریوں کی زبان سے بے حد قریب ہیں ۔موجودہ محققین اس بات کے قائل ہیں کہ آریاوادیٔ سندھ میں گاہے بہ گاہے داخل ہوئے ،البتہ ان کی یہ ہجرت کسی منظم عمل یا عسکری مہم جوئی کا نتیجہ نہیں تھی ،کیونکہ محققین کو اس خطے میں جنگ ،مزاحمت یا تباہی کے آثار نہیں ملے ہیں ۔(تہذیبوں کی کایاکلپ۔کیرن آرامسٹرانگ۔ص۳۴)لیکن ویدوں کی دعائوں سے یکسر الگ تاثر قائم ہوتاہے ۔رگ وید کی دعائوں کے مطابق ہندوستان کے مقامی قبائل جنہیں ’داس ‘ اور ’دسیو‘ کہا گیا ،آریوں کی ہندوستان مہاجرت میں مزاحم ہوئے تھے ۔انہوں نے آریوں کے ہندوستان میں داخلے کے خلاف مزاحمت کی ،جس کے نتیجہ میں خوں ریز جنگیں وجود میں آئیں ۔بعض محققین مقامی باشندوں کو دراوڑ اور آسٹرک قبیلوں سے تعبیر کرتے ہیں جبکہ تاریخ کے مطالعہ سے معلوم ہوتاہے کہ یہ لوگ بھی آریوں کی طرح ہندوستان میں باہر سے داخل ہوئے تھے ۔آریوں کی ہندوستان آمد اندازاً (۲۳۰۰۰ ق م تا ۲۰۰۰ ق م )رہی ہوگی ۔اس وقت سندھ میں موہن جوداڑواور ہڑپا جیسی عظیم تہذیبیں ختم ہوچکی تھیں ۔البتہ ان تہذیبوں کے بچے کھچے آثار موجود رہے ہوں گے ۔معروف مورخ مسٹر آر۔سی۔دت تو آریوں کو ہی ہندو سے تعبیر کرتے ہیں،اس طرح یہ ثابت ہوتاہے کہ ہندو(یعنی ہند آریہ)بھی ہندوستان کے اصل باشندے نہیں ہیں۔(قدیم ہندوستان کی تہذیب۔آر۔سی۔دت۔ص۷ تا ۱۰)
تاریخ کے مطابق آریائی بظاہر موحد نہیں تھے،البتہ زرتشتوں کے عقائد میں توحید کا عنصر موجود تھا ۔ان کے یہاں خدا کی طاقت کے مختلف مظاہر تھے ۔البتہ دیوس پتر کو وہ آسمان کا دیوتا مانتے تھے جو کائنات کا خالق بھی تھا ۔وہ دیوس پتر کو انتہائی مقدس اور بلند و برتر تصور کرتےتھے جس تک رسائی محال تھی ۔لہذاانہوں نے ایسے چھوٹے چھوٹے دیوتا بھی بنائے جن سے قرب اور رسائی آسان ہوسکے ۔ہندودھرم کے بنیادی عقائد آریوں سے مستعار لئے گئے ہیں کیونکہ فاتح قوموں کا تمدن اورعقائد مفتوحہ قوموں پر اثرانداز ہوتے ہیں ۔ویدوں میں جتنے دیوتائوں کا تذکرہ کیا گیاہے ،ہندو دھر م میں ان سبھی دیوتائوں کو مقدس مانا جاتاہے ۔جیسے اندر دیوتا جسے آسمان کا جرنیل سمجھا جاتاہے جس نے اژدھا نما ایک سہ سری عفریت ورتر کو زیر کیا تھا،اس نے کائنات کو جوکہ اولاً ایک ژولیدہ ہیولے کی شکل میں تھی ،موجودہ وضعیت اور ہئیت عطا کی۔(تہذیبوں کی کایا کلپ۔کیرن آرمسٹرانگ۔ص۲۰)جس وقت آریائی ہندوستانی سرحدوں میں داخل ہورہے تھے اورمقامی قبائل ان کی ہجرت میں مزاحم ہوئے ،اس وقت مقامی قبائل کو شکست دینے اور فتح و ظفر کے لئے آریوں نے ’اندر دیوتا‘ سے دعائیں کی تھیں ،جن کا مجموعہ ’رگ وید ‘ کی شکل میں موجود ہے ۔
آریوں میںبھی ’بلی‘ اور بھینٹ کا تصورموجود تھا ۔یہ تصور آج بھی مذہبی عقیدے کی شکل میں ہندوئوں میں قائم ہے۔وہ آئے دن اپنے دیوتائوں کو قربانی اور نذرانے پیش کرتے تھے ۔عام طورپر اشیائے خوردونوش کو بطور نذرانہ پیش کیا جا تا تھا ۔خاص موقعوں پر جانوروں کی ’بلی ‘ بھی چڑھائی جاتی تھی ۔آریائی اپنے پالتو جانوروں سے بہت عقیدت رکھتے تھے لہذا ان کو مارنا جرم شمار ہوتا تھا ۔لیکن ایسانہیں ہے کہ وہ گوشت خور نہیں تھے ۔مذہبی اصول و ضوابط کے مطابق ذبح کئے گئے جانور کا گوشت کھانا حلال سمجھا جاتا تھا ۔گوشت خوری کا ذکر ہنود کی مختلف مذہبی کتابوں میں بھی ملتاہے۔ موجودہ عہد میں سنگھ حلال گوشت پر تنازعہ کھڑا کررہاہے جبکہ ہندآریائی اپنے مذہبی اصو ل و ضوابط کے مطابق ذبح کئے ہوئے جانور کا گوشت کھاناہی جائز سمجھتے تھے ۔یہی طریق کار ہنود میں بھی رائج رہا۔( تہذیبوں کی کایا کلپ ۔کیرن آرامسٹرانگ ۔ص۲۲)اسلام میں بھی اس کے قانون کے مطابق ذبح کئے ہوئے جانور کے گوشت کو جائز کہا گیاہے،جس پر آج واویلا مچا ہواہے ۔ذبیحہ مذہبی اصول و ضوابط کےمطابق ہوتاہے جو تمام قدیم مذاہب میں بھی رائج تھا ۔
زرتُشت کا عہد آریائی تاریخ میں اہمیت کا حامل ہے ۔اس نے زمام حکومت سنبھالتے ہی مختلف اصلاحات کو رواج دیا جنہیں آریائی لوگوں نے پسند نہیں کیا ۔زرتشت نے دیوتائوں کو خیر و شر اور نیکی و بدی کے لحاظ سے دو حصوں میں تقسیم کردیا تھا ،یہ عقیدہ ہندودھرم میں آج تک قائم ہے ۔زرتشت کی موت کے بعد آریوں میں اختلافات پنپنے لگے لہذا اس کے پیروکار جنہیں ’اوستا آریائی ‘کہا جاتاہے جنوب کی طرف ہجرت کرگئے اور مشرقی ایران میں آباد ہوگئے ۔(قدیم ہندوستان کی تاریخ۔رما شنکر ترپاٹھی۔ص۵۳ تا ۵۵)ایران میں انکے آباد ہونے کے بعد زرتشتی نظریات و عقاید نے قومی مذہب کی شکل اختیار کرلی ۔ہند آریائی زرتشتوں کے بالمقابل امن پسند نہیں تھے ۔انہیں تلوار اور گھوڑے سے بے حد عشق تھا ۔یہ لوگ زرخیز چراگاہوں کو ہتھیانے اور گایوں کو چرانے میں مہارت رکھتے تھے ۔اپنی اسی جبلت کے تحت وہ اندر دیوتا کی پرستش کرتے تھے ۔یہ وہ عہد تھاکہ جب سنسکرت آریوں کے ایک گروہ نے روسی چراگاہوں میں ہنگامہ برپا کررکھا تھا ۔ان کے اس مجادلانہ رویے سے تنگ آکر ایک گروہ خاموشی کے ساتھ جنوب کی طرف ہجرت کرگیا جو افغانستان سے گذرکر دریائے سندھ کے معاون دریائوں کے بیچ واقع پنجاب کے زرخیز میدانوں میں آباد ہوگئے ۔انہوں نے اپنی نئی تہذیب کو ’سپت سندھو‘ یعنی سات دریائو ں کا نام دیا ۔قدیم آریائی تہذیب کی سب سے بڑی دین ’’براہمی رسم الخط‘ ہے جس کا ارتقا ہندوستان میں ہوا۔ہندوستان کی تمام زبانوں کی لکھاوٹوں کا مآخذیہی رسم الخط ہے جسے آریوں نے ابتدا سے اپنی زبانوں کے لئے استعمال کیا تھا۔(اردو زبان کی تاریخ کا خاکہ ۔مسعود حسین خاں۔ص۸ تا ۱۲)
ویدی زمانے کے آخری دور میں آریائی باشندوں کے ایک گروہ نے مشرق کی جانب سے دریائے گنگا اور جمنا کے درمیان دو آبہ کے علاقےمیں آباد ہونا شروع کیا۔یہ علاقہ تاریخ میں آریا ورت یعنی آریوں کی سرزمین کے نام سے متعارف ہے ۔یہاں آریوں نے الگ الگ ریاستیں قائم کیں ۔کوروپنچالہ کے بادشاہوں نے دریائے گنگا سے ملحق شمال مغربی کنارے کے میدانی علاقوں میں اپنی ریاست قائم کی اور ہستناپور کو اپنا پایۂ تخت بنایاجبکہ یادو قبائل نے جنوب کی طرف متھرا میں حکومت کی بنیادی استوار کیں۔(قدیم ہندوستان کی تہذیب۔آر۔سی۔ دت۔ص ۱۰)ویدی دور کے آغاز اور ارتقائی عہد میں برہمنوں کو مرکزیت حاصل نہیں تھی مگر امتداد زمانہ کے ساتھ برہمنوں نے سماجی و سیاسی شعبوں میں مرکزیت حاصل کرلی ۔انہیں دیوتائوں کے جیسا تقدس اور برتری دیدی گئی ۔اس تقدس اور برتری کا انہوں نے بیجا استعمال کیا جس کا خمیازہ آج تک تاریخ اور سماج کو بھگتنا پڑرہاہے ۔برہمنوں کی اسی بالادستی اور طبقاتی نظام فکر نے ہندوستان کو صدیوں پیچھے دھکیل دیا ۔آج سنگھ اسی طرز فکر کو رواج دینے کی سعی کررہاہے ،جبکہ اس کے ظاہری افکارونظریات برہمنیت زدہ نظام کے آئینہ دار نہیں ہیں ۔لیکن منوؔ کے قانون کا احیااور اس کے نفاذ کی مسلسل کوششیں برہمن واد کا شاخسانہ ہے ۔اسی لئے آج مسلمانوں کی قومیت اور ہندوستان کے ’ہندوراشٹر‘ کا مسئلہ زیر بحث ہے ۔بہتر ہوگاکہ سنگھ پہلے ہندوستان کی تاریخ کا از سرنو مطالعہ کرے تاکہ تسامحات اور تجاہلات کاخاتمہ ہوسکے ۔تاریخ کی باز نویسی کے ذریعہ بھی بعض حقائق کی تلبیس اور تدلیس تو ممکن ہے مگر حقائق کومٹایا نہیں جاسکتا۔

سیاسی

ہندوستان میں قومیت کی بنیادیں اور سوال

اہم لنکس

حالیہ پوسٹس

مفید سائٹس

رابطہ