ہاتھرس کی ’نربھیا‘ نے یوگی کی ہیکڑی نکال دی

860 M.U.H 06/10/2020

تحریر: اعظم شہاب

دسمبر 2012 یعنی 8 سال قبل دہلی میں ہوئے نربھیا اجتماعی عصمت دری کے خلاف پورا ملک سراپا احتجاج بن گیا تھا۔ دہلی سمیت ملک کے ہر بڑے شہر میں اس کے خلاف آواز بلند ہوئی تھی، لوگ سڑکوں پر اتر آئے تھے، کینڈل مارچ نکالے گئے تھے، پورا ملک نربھیا کے گھر والوں کے ساتھ کھڑا ہوگیا تھا، آج کی حکمراں جماعت بی جے پی کے لوگ تو نربھیا کو انصاف دلانے کے لیے باقاعدہ ایک مہم چلائے ہوئے تھے۔ بالآخر انصاف ہوا اور مارچ 2020 میں اس جرم کے مرتکبین اپنے انجام کو پہنچ گئے۔ دہلی کے اس واقعے کو فلیش بیک میں رکھتے ہوئے اب ذرا دہلی سے محض 160 کلومیٹر دور ہاتھرس ضلع کے بولگڈھی گاؤں چلتے ہیں، جہاں 14 ستمبر 2020 کو والمیکی برادری کی ایک 19 سالہ لڑکی کے ساتھ نہ صرف اجتماعی عصمت دری کی گئی، بلکہ اس پر اس قدر تشدد کیا گیا کہ دہلی کے صفدر گنج اسپتال میں 29 ستمبر کو اس کی موت ہوگئی۔

اب ذرا نربھیا کے واقعے کو ذہن میں تازہ کرتے ہوئے یہ تصور کریں کہ اگر اس وقت اس گھناؤنے جرم کے خلاف اٹھنے والی آواز کو دبا دیا جاتا، اگر لوگوں کو احتجاج سے روک دیا گیا ہوتا، اپوزیشن یعنی کہ بی جے پی کے جو لیڈران بڑھ چڑھ کر نربھیا کے گھر والوں سے ملاقات کر رہے تھے اور تصویریں میڈیا میں شیئر کر رہے تھے ان کی ملاقاتوں پر روک لگا دی گئی ہوتی، میڈیا کے لوگوں کو اس کے گھروالوں سے ملنے سے روکا گیا ہوتا یا اگر اس وقت کی حکومت نربھیا کے قاتلوں کو بچانے کی کوشش میں لگ گئی ہوتی تو اس کا کیا نتیجہ نکلتا؟ کیا نربھیا کے مجرم اپنے انجام کو پہنچ پاتے؟ لیکن بدقسمتی سے ہاتھرس معاملے میں ایسا ہی ہوا اور ہو رہا ہے۔ گوکہ اپوزیشن اور میڈیا کے لوگوں کو مقتولہ کے گھر والوں سے ملنے کی اجازت دے دی گئی، مگر یہ اجازت چارو ناچار دی گئی ہے۔

اترپردیش کی اجے کمار بشٹ المعروف یوگی آدتیہ ناتھ حکومت نے ابتداء میں اس جرم کے مرتکبین کو بچانے کی کوشش کی۔ یہی وجہ ہے کہ پولیس نے اس کی ایف آئی آر تک لکھنے میں چار پانچ دنوں تک ٹال مٹول کی، مگر جب معاملہ سنگین رخ اختیار کرگیا تو بادل نخواستہ ایف آئی آر درج کرنی پڑی۔ لیکن اس ایف آئی آر کے باوجود یوگی حکومت اور پولیس کا تعاون ان ٹھاکر برادری کے ساتھ ہی رہا جو بی جے پی کے روایتی ووٹرس ہیں۔ یعنی کہ جرم کی سنگینی ایک طرف، یوگی جی کی پوری کوشش اپنے ووٹروں کو بچانی کی رہی۔ اگر ایسا نہ ہوتا تو کیا بولگڈھی کے اطراف کے درجن بھر گاؤں والے اپنی پنچایت کے ذریعے علانیہ طور پر ملزمین کی حمایت کا اعلان کرسکتے تھے؟ ان گاؤں والوں کو یہ موقع یوگی جی نے اس طرح فراہم کیا کہ اپنی پولیس کے ذریعے یہ اعلان کروا دیا کہ متاثرہ کی عصمت دری ہوئی ہی نہیں۔ اس بنیاد پر ٹھاکر برادی کے لوگوں نے اسے اپنے خلاف سازش سمجھ لیا اور ملزمین کی حمایت کا اعلان کردیا۔ جبکہ یہ بات میڈیکل کی معمولی شدبد رکھنے والے کو بھی معلوم ہے کہ عصمت دری کے معاملے میں 72 گھنٹے کے اندر میڈیکل ایگزامنیشن کیا جانا ضروری ہوتا ہے۔

یہی نہیں بلکہ مقتولہ کا دوبارہ میڈیکل ایگزامنیشن کے امکان کو ختم کرنے کے لیے یوگی کی بہادر پولیس نے راتوں رات اس کے اہلِ خانہ کی عدم موجودگی میں لاش کو نذرِ آتش بھی کردیا۔ جبکہ والمیکی سماج کی یہ روایت ہے کہ ان کے یہاں غیرشادی شدہ لڑکی کو جلایا نہیں بلکہ دفنایا جاتا ہے۔ مگر پولیس نے اوپر کے احکام کی پاسداری میں اس کا بھی لحاظ نہیں کیا۔ اس کے علاوہ یوگی جی کی حکومت نے اسی میڈیکل رپورٹ کی بنیاد پر اس واقعے کو عصمت دری کے بجائے آپسی رنجش قرار دینے کے لیے ایک پی آر ایجنسی تک کی خدمات حاصل کرلی، جس نے بی جے پی آئی ٹی سیل کی مدد سے متاثرہ و اس کے اہلِ خانہ کو ہی کٹہرے میں کھڑا کرنے کی انتھک کوشش کی۔ مگر خون پھر خون ہی ہوتا ہے جو اپنے قاتل کے گریبان سے ایسے چمٹ جاتا ہے کہ لاکھ کوشش کے باوجود پیچھا نہیں چھوڑتا۔ یوگی جی کی اس پی آر ایجنسی کی کوششوں کا بھی یہی انجام ہوا کہ بجائے یوگی جی کے جنگل راج کے کوراَپ کرنے کے بجائے اس نے انہیں اور بھی اجاگر کردیا۔ یوگی کی پولیس نے متاثرہ خاندان کے نارکوٹسٹ کا اعلان کیا توخود یوگی جی کے نارکوٹسٹ کی مانگ اٹھنے لگی ہے۔ لوگوں کا کہنا ہے کہ یوگی جی کا نارکوٹسٹ کرلیا جائے تو معلوم ہوجائے گا کہ انہوں نے اس واقعے کے ملزمین کو بچانے کے لیے کس طرح کے احکامات پولیس کو دیئے تھے۔

ہاتھرس کے اس دلدوز واقعے پر پردہ ڈالنے اور یوگی جی کی ناکامی کو چھپانے کے لیے جتنی بھی کوششیں ہو رہی ہیں، مقتولہ کا خون ان سب پردوں کو چاک کرکے ابل پڑ رہا ہے۔ اس کی لیپا پوتی کے لیے یوگی جی نے ایس آئی ٹی کی تشکیل کا اعلان کرکے بولگڈھی میں میڈیا ودیگر باہری لوگوں کو جانے سے روک دیا تھا۔ 2 اکتوبر کو گاؤں کے باہر تعینات پولیس والوں کا کہنا تھا کہ ایس آئی ٹی کے لوگ تفتیش کر رہے ہیں، اس گاؤں میں کسی کو بھی جانے پر پابندی ہے۔ مگر دوسرے روز یعنی کہ 3 اکتوبر کو ہی یہ بات میڈیا میں آگئی کہ ایس آئی ٹی کا کوئی رکن 2 اکتوبر کو گاؤں گیا ہی نہیں۔ پھر بتایا گیا کہ چونکہ گاؤں اور اس کے اطرف میں دفعہ 144 لاگو کر دی گئی ہے اس لیے کوئی بھی گاؤں میں نہیں جاسکتا، مگر راہل گاندھی نے یہ کہہ کر اس بہانے کی بھی ہوا نکال دی کہ وہ اکیلے ہی گاؤں جائیں گے۔ مگر ان کے اور ٹی ایم سی کے رکن پارلیمنٹ کے ساتھ پولیس کی زیادتیوں نے ملک کو دکھادیا کہ یوگی جی اپنی مجرمانہ منصوبہ بندی کے بے نقاب ہونے سے روکنے کے لیے کس حد تک جاسکتے ہیں۔

ہاتھرس کے اس معاملے نے یہ بھی اجاگر کر دیا ہے کہ 8 سال قبل نربھیا کے معاملے میں بی جے پی کا احتجاج مقتولہ کو انصاف دلانا نہیں بلکہ حکومت کے خلاف رائے عامہ ہموار کرنا تھا۔ اسے معلوم ہے کہ ہاتھرس کے اس سانحے پر عوامی احتجاج اس کی مکروہ سیاست بے نقاب کردے گا۔ اسی لیے وہ اپنی زرخرید میڈیا کو بھی اس کے کوریج سے روک رہی ہے، اور اپوزیشن کی راہ میں بھی رکاوٹ پیدا کر رہی ہے۔ مگر یوگی جی اپنے اہنکار میں یہ بھول گئے کہ وہ جس رام راجیہ کی بات کر رہے ہیں، اسی رام کا رامائن ایک والمیکی نے ہی لکھا تھا۔ آج جبکہ یوگی آدتیہ ناتھ اہنکار کے بلند چوٹی پر براجمان ہیں، والمیکی سماج کی ایک بیٹی نے اپنی جان دے کر ان کے اہنکار کے سنگھاسن کو ہلا دیا ہے۔

سیاسی

ہاتھرس کی ’نربھیا‘ نے یوگی کی ہیکڑی نکال دی

اہم لنکس

حالیہ پوسٹس

مفید سائٹس

رابطہ