جنگ یمن کے خاتمے کے لیے عالمی تحریک شدت اختیار کر گئی
1208
M.U.H
16/12/2018
ایران کی وزارت خارجہ کے ترجمان نے کہا ہے کہ جنگ یمن بند کرانے کے لئے زندہ ضمیر لوگوں کی عالمی تحریک شروع ہو گئی ہے۔
اپنے ایک انٹرویو میں ایران کی وزارت خارجہ کے ترجمان بہرام قاسمی نے کہا کہ بحران یمن نئے مرحلے میں داخل ہو گیا ہے جس میں ایک طرف اقوام متحدہ ہے اور دوسری جانب بعض یورپی ممالک بھی سعودی اتحاد پر اپنا دباؤ ڈال رہے ہیں۔
بہرام قاسمی نے اپریل دو ہزار پندرہ میں ایران کی جانب سے پیش کیے جانے والے چودہ نکاتی امن منصوبے کی جانب اشارہ کرتے ہوئے کہا کہ یہ منصوبہ یمن میں قیام امن اور جارحیت کے خاتمے میں اب بھی موثر واقع ہو سکتا ہے۔
ایران کی وزارت خارجہ کے ترجمان نے سوئیڈن یمن کے امن مذاکرات کے نتائج کے بارے میں تہران کی جانب سے خیرمقدم کئے جانے کا ذکر کرتے ہوئے یہ بات زور دے کر کہی کہ اقوام متحدہ اور تمام موثر ممالک کی کوششوں سے یمن کے مسئلہ کو موثر طریقے حل اور جارحیت کا راستہ روکا جانا چاہیے۔
انہوں نے انسانی امداد کی فراہمی، زخمیوں کی بیرون ملک منتقلی اور اسٹاک ہوم مذاکرات کا سلسلہ جاری رکھے جانے کی ضرورت پر بھی زور دیا۔
