شیاطین اور کفار پر غلبہ پانے کا واحد راستہ قرآن پر عمل اور استقامت ہے: آیت اللہ خامنہ ای
3054
m.u.h
07/05/2019
رہبرانقلاب اسلامی نے فرمایا کہ شیطانوں اور کفار پر غلبہ حاصل کرنے کا واحد راستہ قرآنی تعلیمات پر عمل اور استقامت ہے
رہبرانقلاب اسلامی آیت اللہ العظمی سید علی خامنہ ای نے حسینیہ امام خمینی میں ماہ مبارک رمضان کی آمد کی مناسبت سے منعقدہ محفل قرآن میں خطاب کرتے ہوئے فرمایا کہ گذشتہ چالیس برسوں کے دوران ایرانی عوام کو روز افزوں عزت اور غیر معمولی پیشرفت قرآن کریم پر عمل اور استقامت کی وجہ سے حاصل ہوئی ہے اور آج بھی شیاطین اور کفار پر غلبہ پانے کا واحد راستہ قرآن کریم پر عمل اور استقامت ہے -
رہبرانقلاب اسلامی نے فرمایا کہ آج انسانیت اور اسلامی معاشرے کی بنیادی ضرورت قرآنی تعلیمات کا ادراک اور ان پر عمل کرنا ہے۔ آپ نے فرمایاکہ عصر حاضر میں عالم اسلام کی مشکلات کی وجہ یہ ہے کہ وہ قرآنی تعلیمات سے دور ہوگیا ہے -
رہبرانقلاب اسلامی نے فرمایا کہ جولوگ حکومت میں رہ کر ملک کے صدر یا بادشاہ کی حیثیت سے قوموں پر ظلم و زیادتی کرتے ہیں قرآن کریم نے ایسے ہی لوگوں خلاف صریحی حکم دیا ہے کا ان کا مقابلہ کیا جائے اور ان پر اعتماد نہ کیا جائے -
آیت اللہ العظمی سید علی خامنہ ای نے چند سال قبل بعض اسلامی ملکوں میں رونما ہونے والی اسلامی بیداری کی تحریک اور عوامی انقلاب کا ذکرکرتے ہوئے فرمایا کہ یہ تحریکیں اس لئے خاموش ہوگئیں کہ ان کی قدر نہیں کی گئی اور امریکا و اسرائیل پر اعتماد کرلیا گیا لیکن ایران کے عوام نے جو امام خمینی رحمت اللہ علیہ کی قیادت میں قرآنی تعلیمات سے سرشار تھے اپنے انقلاب کی قدر کی اور پہلے روز سے ہی انہوں نے سامراجی طاقتوں پر نہ صرف یہ کہ اعتماد نہیں کیا بلکہ ان کے مقابلے میں استقامت کا مظاہرہ کیا۔ آپ نے فرمایا کہ قرآن کریم ایک غیر معمولی اور لاثانی شاہکار اور کتاب ہے اور قرآن سے انس و لگاؤ معاشرے کے استحکام کا باعث بنتا ہے اور یہ عمل دنیوی مسائل کو حل کرنے کے ساتھ ساتھ اخروی سعادت کا بھی سبب قرارپاتا ہے -
